സഖാവിനെ തുരത്താന്‍ ഒബാമ

വല്ലാതെ മെലിഞ്ഞുപോയ ഡയബറ്റിസ് പേഷ്യന്‍റിന്‍റെ അവസ്ഥയിലാണിപ്പോള്‍ നമ്മുടെ സിപിഎം. ഇതു പറയുന്നതുകൊണ്ട് എന്നെ പാര്‍ട്ടി വിരുദ്ധനാക്കരുത്. ചാനല്‍ ചര്‍ച്ചകളില്‍ ആരും വിളിച്ചിട്ടില്ലാത്തതുകൊണ്ട് പരസ്യമായി എന്‍റെ അഭിപ്രായങ്ങള്‍ ആരും കേട്ടിട്ടില്ലെന്നേയുള്ളൂ. ആളു മിടുക്കനാ.
പറഞ്ഞുവന്നത്, നമ്മുടെ പാര്‍ട്ടി ഇങ്ങനെ മെലിയുന്നതിന്‍റെ കാരണം കണ്ടുപിടിക്കേണ്ടേ? രണ്ടു കൊല്ലം കൂടി ഉന്തിത്തള്ളി വിട്ടാല്‍പ്പിന്നെ ചിന്തിക്കാന്‍ അഞ്ചു വര്‍ഷം കിട്ടുമെന്നതൊക്കെ ശരിതന്നെ. പക്ഷേ, അക്കാലത്തു കഞ്ഞി കുടിച്ച്, സോറി, ചിക്കനും മട്ടനും ഫ്രൈഡ് റൈസും കഴിച്ച്, കഴിയാന്‍ എന്തെങ്കിലും തരപ്പെടുത്തേണ്ട സമയത്ത് എന്തിനാ ഇങ്ങനെ തര്‍ക്കിച്ചു സമയം കളയുന്നത്.
കാരാട്ട് സഖാവ് പറഞ്ഞതാ ശരി. പിണറായി സഖാവ് മാറേണ്ട കാര്യമേയില്ല. കാരാട്ട് സഖാവിനു കാര്യവിവരമുണ്ട്. പത്തു പുത്തനുണ്ടാക്കാന്‍ പിണറായി സഖാവല്ലാതെ വേറാരുണ്ട് പാര്‍ട്ടിയില്‍.
മൂന്നു കൊല്ലം മുമ്പ് നിയമസഭയിലേക്കു മത്സരിക്കാന്‍ സീറ്റ് കിട്ടാതെ വന്നപ്പോള്‍ മാത്രം തുടങ്ങിയ അച്ചുമാമന്‍റെ പത്രക്കാരോടുള്ള ചിരികളി അത്ര ആത്മാര്‍ഥമാണെന്നൊന്നും ആരും കരുതേണ്ട. അതിനു മുമ്പ് എന്തായിരുന്നു കഥ. ബലംപിടിച്ചുള്ള നടത്തവും ആരെങ്കിലും എന്തെങ്കിലും ചോദിച്ചാല്‍ ചീറിക്കൊണ്ടു ചെല്ലലുമൊക്കെയായിരുന്നില്ലേ അമ്മാവന്‍റെ രീതി. അതു മാറിയെന്ന് ആരാ പറഞ്ഞത്.
തത്കാലം മാധ്യമസിന്‍ഡിക്കേറ്റിനെ ആവശ്യമുള്ളതുകൊണ്ടു ചിരിച്ചു കാണിക്കുന്നതല്ലേ.
ഇതെല്ലാം സഖാവ് കാരാട്ടിനറിയാം. സ്വന്തം വൃന്ദ പോലും എതിര്‍ത്തിട്ടും കാരാട്ട് സഖാവ് പിണറായി സഖാവിന്‍റെ കാര്യത്തില്‍ വിട്ടുവീഴ്ച ചെയ്യാത്തതില്‍ കാര്യമില്ലെന്നാണോ കരുതുന്നത്.
ജയരാജ ത്രയ സഖാക്കളും പിണറായി സഖാവും കൂടി‍ എത്ര കഷ്ടപ്പെട്ടാ പാര്‍ട്ടിയെ വളര്‍ത്തുന്നത്. അതു മറക്കരുത്. മൂടു മറന്നു പൊങ്ങിയാല്‍ നിലത്താകും സ്ഥാനം. സാന്‍റിയാഗോ മാര്‍ട്ടിന്‍റെയും ഫാരിസ് അബൂബക്കറിന്‍റെയും കൈയില്‍ നിന്നു കാശ് വാങ്ങിയെന്നതാണ് അവര്‍ ചെയ്ത അപരാധം. അത് അത്രവലിയ തെറ്റാണോ. ആരെങ്കിലും സമ്പത്ത് കുന്നൂകൂട്ടിയിട്ടുണ്ടെങ്കില്‍ അതു പിടിച്ചെടുത്ത് പാവങ്ങള്‍ക്കു കൊടുക്കുകയെന്നതല്ലേ കമ്യൂണിസത്തിന്‍റെ അടിസ്ഥാനം. അതല്ലേ നമ്മുടെ സഖാക്കളും ചെയ്തുള്ളൂ. പാവപ്പെട്ട ദേശാഭിമാനി സഖാക്കളെ ഊട്ടാനാണു പലതു ചെയ്തതെന്നതല്ലേ വസ്തുത. അല്ലെങ്കില്‍ത്തന്നെ പിച്ചച്ചട്ടിയിലൊന്നുമല്ലല്ലോ കൈയിട്ടുവാരിയത്. ഇതൊക്കെയായിട്ടും കുറ്റപ്പെടുത്തല്‍ സഹിക്കാനാവാതെ വാങ്ങിയതു തിരിച്ചു കൊടുത്തെന്നു പറഞ്ഞില്ലേ. പറച്ചില്‍ മാത്രമേ ഉണ്ടായുള്ളൂവെന്നു ചില പിന്തിരിപ്പന്‍മാര്‍ പറയുന്നതു മുഖവിലയ്ക്കെടുക്കേണ്ട.
പരിപ്പുവടയും ചായയും ദിനേശ് ബീഡിയും കക്ഷത്തിലൊരു ഡയറിയുമായി പാര്‍ട്ടി വളര്‍ത്താനാവില്ലല്ലോ. അതു തുറന്നു പറയാനുള്ള ചങ്കൂറ്റം കാണിച്ചതാണോ തെറ്റ്.
ഇപ്പോള്‍ പിണറായി സഖാവ് ചെയ്തതും എന്താ? ബഹുരാഷ്ട്ര കുത്തകയായ ലാവ്ലിനെ കുളം തോണ്ടിക്കാന്‍ ശ്രമിക്കുകയല്ലായിരുന്നോ. ഇതെല്ലാം ഇവിടത്തെ ജനങ്ങള്‍ക്കറിയാം. പിന്നെ, ലോക്സഭാ തെരഞ്ഞെടുപ്പില്‍ എങ്ങനെ തോറ്റെന്നതും പകല്‍ പോലെ വ്യക്തമല്ലേ. വോട്ടു ചെയ്തത് ആരാ? സാക്ഷാല്‍ സാമ്രാജ്യത്വത്തിന്‍റെ തലവന്‍മാരായ അമേരിക്കയല്ലേ. ഞങ്ങളുടെ നാട്ടിലൊക്കെ തെരഞ്ഞെടുപ്പിനു തലേന്നു രാത്രി ഒബാമ നേരിട്ടാ വീടുകയറാന്‍ വന്നത്. പലര്‍ക്കും പലതും കൊടുത്തു. പിന്നെ വോട്ടിംഗ് മെഷീനൊക്കെ കണ്ടു പിടിച്ചത് വിദേശികളല്ലേ. അതിനകത്ത് സിഐഎ എന്തോ ചില കുന്ത്രാണ്ടം ഒപ്പിച്ചിരുന്നു. അതു സംശയമില്ലാത്ത കാര്യമാ. പണ്ടു സദ്ദാം ഹുസൈനെ തൂക്കിക്കൊന്നപ്പം പിണറായി സഖാവ് രൂക്ഷമായി പ്രതികരിച്ചതാണ് ഇപ്പോഴത്തെ പ്രശ്നങ്ങള്‍ക്കെല്ലാം കാരണം. അന്നു ഹര്‍ത്താല്‍ നടത്തി ബുഷിനെ ഞെട്ടിച്ച സഖാവിനെ തകര്‍ക്കാന്‍ അമേരിക്ക എന്തെല്ലാം കളികളാ കളിക്കുന്നത്. സഖാവിനെ എങ്ങനെങ്കിലും ഒതുക്കാതെ തങ്ങള്‍ക്കു നിലനില്‍പ്പില്ലെന്ന് അമേരിക്കയ്ക്കറിയാം. ഇക്കാര്യം നേരിട്ടു മനസിലാക്കിയിട്ടാണു ജയരാജന്‍ ത്രയം പിണറായി സഖാവിനെ സംരക്ഷിക്കാന്‍ കച്ചമുറുക്കുന്നത്. ഇതെല്ലാം അറിയാവുന്ന ഒരു പുലിയായ മാധ്യമപ്രവര്‍ത്തകനുമുണ്ട്. അദ്ദേഹം ഇംഗ്ലീഷ് പത്രത്തില്‍ ജോലി ചെയ്തിട്ടുള്ളതുകൊണ്ട് സഖാക്കളെ അറിയിക്കേണ്ട പല കാര്യങ്ങളും ഒബാമ അദ്ദേഹത്തിലൂടെയാണ് അറിയിക്കുന്നത്.
ഇതൊന്നും മനസിലാക്കാതെ പാര്‍ട്ടിയെ ക്ഷീണിപ്പിച്ചതുകൊണ്ട് ആര്‍ക്കാണു നേട്ടം.
അങ്ങനെയങ്ങനെ പറഞ്ഞാലൊടുങ്ങാത്ത കാര്യങ്ങള്‍ അണിയറയിലുണ്ട്. അതാണു കാരാട്ട് സഖാവ് പറയുന്നത്, പിണറായി സഖാവിനെ മാറ്റില്ലെന്ന്. ഇപ്പോള്‍ ഏകദേശം കാര്യങ്ങളുടെ പോക്ക് മനസിലായിക്കാണുമല്ലോ. ഇല്ലെങ്കില്‍, കൂടുതലൊന്നും പറയാനില്ല. ഇന്‍റര്‍നെറ്റും സാമ്രാജ്യത്വത്തിന്‍റെ കൈയിലല്ലേ. കൂടുതലെഴുതിയാല്‍ ഈ ബ്ലോഗും ഒബാമ ബ്ലോക്ക് ചെയ്തേക്കും.

അതുമിതും പറയാം, അല്ലാതെന്തു ചെയ്യാന്‍

എന്തൊക്കെയായിരുന്നു അബ്ദുള്ളക്കുട്ടിയെക്കുറിച്ചു പറഞ്ഞിരുന്നത്? എല്ലാം കഴിഞ്ഞു. ഇനി അതെല്ലാം പഴങ്കഥ. വിരുദ്ധനെ പുറത്താക്കി. (കടപ്പാട്: വാര്‍ത്താകേരളം.കോം)പാര്‍ട്ടിക്ക് ആശ്വസിക്കാം. അഥവാ പാര്‍ട്ടി നേതാക്കള്‍ക്ക് സമാധാനത്തോടെ മുസ്‌ലിം പ്രേമം വിളിച്ചു പറയാം. നരാധമനായ മോഡിയെ മഹത്വവത്കരിക്കാന്‍ ശ്രമിച്ചാല്‍, അതു മുസ്‌ലിമായാല്‍പ്പോലും, വച്ചു പൊറുപ്പിക്കില്ലെന്ന് ഉറക്കെ പറയാം. അതാണു വേണ്ടതും. സിപിഎമ്മില്‍ എത്ര മുസ്‌ലിങ്ങളുണ്ട് നേതാക്കളായിട്ട് എന്ന ചോദ്യം പ്രസക്തമല്ല. ടി.കെ.ഹംസയും പാലോളി മുഹമ്മദ്കുട്ടിയുമുണ്ടല്ലോ. അതുകൊണ്ടു വലിയ പ്രശ്നമില്ലാതെ കാര്യം നടത്താം. മൊല്ലാക്കമാര്‍ക്കും മുക്രിമാര്‍ക്കും വേണ്ടി വാരിക്കോരി ചെലവാക്കുന്ന സര്‍ക്കാരിനെ പാണക്കാട് തങ്ങള്‍ വിചാരിച്ചാല്‍ തകര്‍ക്കാനാവില്ലെന്നു തെളിയിക്കാന്‍ ഇവര്‍ തന്നെ ധാരാളം. രഹസ്യമായി അന്തിക്കൂട്ടിനു പിഡിപിയുമുണ്ട്. അവരെ ചുമക്കാനുള്ള യോഗം സിപിഐക്കായതിനാല്‍ നാറില്ല. പണ്ടൊരു മുതലാളി വേലക്കാരിപ്പെണ്ണിനു ഗര്‍ഭം സമ്മാനിച്ച ശേഷം അതിന്‍റെ ഉത്തരവാദിത്തം ഡ്രൈവറെ ഏല്പിച്ച കാര്യം കേട്ടിട്ടില്ലേ. ഡ്രൈവര്‍ക്കാകട്ടെ മെനക്കെടാതെ ഒരു സന്തതിയെയും കൈ നിറയെ കാശും കിട്ടി. മുതലാളി ഉപയോഗിച്ചു പഴകിയതാണെങ്കിലും പെണ്ണിനെയും. ഇതേപോലെ സിപിഐക്കു കിട്ടിയ പെണ്ണാണല്ലോ പിഡിപി. ആ കണക്കില്‍ ഒരു എംപി സ്ഥാനവും ഉറപ്പിക്കാം. ഇങ്ങനെ ഓരോരോ മനോരാജ്യം കണ്ടു കഴിയുമ്പോഴാണു ശകുനം മുടക്കിയായിട്ട് അബ്ദുള്ളക്കുട്ടി ചിരിച്ചുകാണിച്ചു നില്‍ക്കുന്നത്. മുസ്‌ലിങ്ങളുടെ വോട്ടു കിട്ടാന്‍ മതനിരപേക്ഷത പറഞ്ഞാല്‍ നടക്കില്ലെന്നും അതിന് തനി മലപ്പുറംകാരാവണമെന്നും പിണറായിസഖാവിനും കൂട്ടര്‍ക്കും അറിയാം. ഹിന്ദുക്കളെ പത്തു ചീത്ത വിളിച്ചാല്‍ മതി. മുസ്‌ലിം വോട്ടു പോക്കറ്റിലാകും. കൂടെ പുരോഗമനവാദികളായ ഹിന്ദുക്കളുടെയും. ഹിന്ദുവാണെന്നു തുറന്നു പറയുന്ന ആരെങ്കിലുമുണ്ടെങ്കില്‍ അവരെ ഫാസിസ്റ്റെന്നു വിളിച്ചാല്‍ മതി. മുസ്‌ലിം ആണെങ്കില്‍ കാശ്മീരില്‍ വെടികൊള്ളാന്‍ പോയാലും തരക്കേടില്ല. അവരെ സംരക്ഷിക്കണം. അതിനു കുഴപ്പമില്ല. ഇതാണു പൊതുവേ തുടര്‍ന്നു പോന്ന വിജയമന്ത്രം. അതിനിടയിലാണ് ഒരുത്തന്‍ നരേന്ദ്രമോഡിയെ പിന്തുണയ്ക്കാനെത്തുന്നത്. മോഡിയെ രണ്ടു തെറി പറഞ്ഞാല്‍ മാത്രം മതി മതനിരപേക്ഷക്കാരുടെ വോട്ടുകിട്ടാന്‍. അതു മനസിലാക്കാന്‍ കഴിയാത്തവരെ പാര്‍ട്ടിക്കു വേണ്ട. കുറഞ്ഞ പക്ഷം ഹിന്ദുക്കളെയെങ്കിലും തെറി വിളിക്കണം. തെറി കേട്ടാലേ ഹിന്ദുക്കള്‍ വോട്ടു ചെയ്യൂ. അവര്‍ അങ്ങനെയാണ്. പക്ഷേ, മുസ്‌ലിങ്ങളും ക്രിസ്ത്യാനികളും അങ്ങനെയല്ല. ആരെങ്കിലും തന്തയ്ക്കു വിളിച്ചാല്‍ വിളിക്കുന്നവന്‍റെ കരണത്തു പൊട്ടിക്കും. ഹിന്ദു വിളിക്കുന്നവന്‍റെ കാല്‍ നക്കും. ചാനലുകളിലൂടെ എനിക്കു തന്തയില്ലേയെന്നു വിളിച്ചു പറയാന്‍ വരെ തയാറാവുന്നവരാണല്ലോ ഹിന്ദു എന്ന ജന്തു. അവനെ വെറുതേ വര്‍ഗീയവാദിയെന്നു വിളിച്ചാല്‍ മാത്രം മതി. മതനിരപേക്ഷക്കാരുടെ വോട്ടു കിട്ടും. മദനിയുടെ വോട്ടും കിട്ടും. സുന്നികളുടെ വഴക്കു തീര്‍ക്കാനും മുന്‍കൈ എടുക്കണം. മതം എന്നു കേള്‍ക്കുന്നതുപോലും അലര്‍ജിയായി കരുതണം. പക്ഷേ, അതു ഹിന്ദുമതത്തെക്കുറിച്ചാവുമ്പോള്‍ മാത്രം. അല്ലാതുള്ളവരെ കെട്ടിപ്പിടിക്കണം. ഇതൊക്കെ ചിന്തിച്ചിരിക്കുമ്പോഴാണ് മുസ്‌ലിമായ അബ്ദുള്ളക്കുട്ടി മോഡിയെക്കുറിച്ചു മയപ്പെടുത്തി പറഞ്ഞത്. സഹിക്കാനൊക്കുമോ. പുറത്താക്കി. മദനിയുടെ പാര്‍ട്ടിയെ ലോക്‌സഭയിലെത്തിക്കാന്‍ തടസം കുറേ മാറിയ ലക്ഷണമാണ്. ഇനി സമാധാനമായി ശരിയത്തുകൂടി നടപ്പാക്കാന്‍ കഴിഞ്ഞാല്‍ വിപ്ലവം പൂര്‍ണമാകും.

കിണ്ണം കട്ടതാര്? അവനോ ഇവനോ?

ആലോചിച്ചിട്ട് ഒരു എത്തുംപിടിയും കിട്ടുന്നില്ല. കിണ്ണംകട്ടതു പിണറായിയോ യുഡിഎഫോ എന്നതാണ് ഇന്നത്തെ ചോദ്യം. ആരായാലും ശരി, ആരോ കട്ടിട്ടുണ്ടെന്നതു വാസ്തവം. ലാവ്‌ലിന്‍, ലാവ്‌ലിന്‍ എന്നു കേട്ടുതുടങ്ങിയിട്ടു നാളേറെയായി. ആരൊക്കെയോ പാവപ്പെട്ട മലയാളിയുടെ നികുതിപ്പണം കൊണ്ടു പുട്ടടിച്ചു എന്നതല്ലാതെ സാധാരണക്കാരന്‍ എന്തറിയാന്‍. ഇതു പോലും മനസിലാകാത്തവരുണ്ട് എന്നതിനു നവകേരള യാത്രയ്ക്ക് അണിഞ്ഞൊരുങ്ങിപ്പോയി സിന്ദാബാദ് വിളിക്കുന്നവര്‍ തന്നെ തെളിവ്.
എസ്എന്‍സി ലാവ്‌ലിന്‍ എന്ന വിവാദ കമ്പനിയാണു പുതിയ വിവാദത്തിനു തിരികൊളുത്തിയിരിക്കുന്നത്. യുഡിഎഫ് സര്‍ക്കാര്‍ ധാരണാപത്രം പുതുക്കാത്തതുകൊണ്ടാണ് മലബാര്‍ കാന്‍സര്‍ സെന്ററിനു ലഭിക്കേണ്ട സഹായം പൂര്‍ണമായി ലഭിക്കാതിരുന്നതെന്നു ലാവ്‌ലിന്‍ ബുധനാഴ്ച അവരുടെ വെബ്സൈറ്റില്‍ വിശദീകരിച്ചു. (വാര്‍ത്താകേരളം ഡോട്കോമില്‍) മണിക്കൂറുകള്‍ക്കു മുമ്പാണു സിപിഎം സംസ്ഥാന സെക്രട്ടറി പിണറായി വിജയന്‍ ഇതേ ആരോപണം ഉന്നയിച്ചതെന്നതാണ് ഏറെ ശ്രദ്ധേയം. പിണറായി പറഞ്ഞുതീരുംമുമ്പേ ലാവ്‌ലിന്‍ വെബ്സൈറ്റില്‍ ഇതേ കാര്യം പറയുകയും പാര്‍ട്ടി ചാനല്‍ കൊണ്ടാടുകയും ചെയ്തത് യാദൃച്ഛികമെന്നു കരുതണമെങ്കില്‍ അടിയുറച്ച സിപിഎം അണിയോ സിഐടിയു യൂണിയനില്‍ അംഗമാകാന്‍ കൊതിച്ചിരിക്കുന്നവരോ ആകണം. അല്ലെങ്കില്‍ ദേശാഭിമാനി മാത്രം വായിക്കുന്നവരായിരിക്കണം. അവര്‍ മറ്റൊന്നും വായിക്കാത്തതുകൊണ്ട് അതില്‍ കാണുന്നതു മാത്രമാണു സത്യം.

ലാവ്‌ലിനും പിണറായിയും തമ്മിലുള്ള ശക്തമായ ബന്ധമാണ് പുതിയ നീക്കം തെളിയിക്കുന്നതെന്നു യുഡിഎഫ് നേതാക്കള്‍ മാത്രമല്ല ചിന്തിച്ചു പോവുക. ലാവ്‌ലിന്‍ നല്‍കിയ വിശദീകരണപ്രകാരം 1998 ഏപ്രില്‍ 25-നാണ് 180 ദിവസത്തെ കാലാവധിയുമായി ധാരണാപത്രം ഒപ്പിട്ടത്. എന്നാല്‍ ഇതു തയാറാക്കിയ എല്‍ഡിഎഫ് സര്‍ക്കാര്‍ ധാരണാപത്രം പുതുക്കിയില്ല. 2001-ല്‍ അധികാരത്തിലെത്തിയ യു.ഡി.എഫ് സര്‍ക്കാര്‍ തങ്ങള്‍ ആവശ്യപ്പെട്ടിട്ടും ധാരണാപത്രം പുതുക്കാന്‍ തയാറായില്ലെന്നും ഇതേത്തുടര്‍ന്നു കരാര്‍ അസാധുവാകുകയായിരുന്നെന്നുമാണു കമ്പനി പറയുന്നത്.
ആരു പറയുന്നതാണു സത്യം? അല്ല, സത്യം അറിയണമെന്ന് ആര്‍ക്കാണിത്ര നിര്‍ബന്ധം?

അഞ്ഞൂറു രൂപയ്ക്കു ലാപ്‌ടോപ്പ്???

വന്നുവന്ന് ലാപ്‌ടോപ്പും വഴിവക്കില്‍ കൂട്ടിയിട്ടു വില്‍ക്കുന്ന സ്ഥിതിയാകുമെന്നു തോന്നുന്നു. വെല്ലൂര്‍ ഇന്‍സ്റ്റിറ്റ്യൂട്ട് ഓഫ് ടെക്നോളജി, ബാംഗളൂരിലെ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സയന്‍സ്, ചെന്നെ ഐ. ഐ.ടി എന്നിവിടങ്ങളിലെ സയന്‍റിസ്റ്റുകള്‍ കണ്ടുപിടിച്ച പുതിയ ലാപ്‌ടോപ്പിനു വില അഞ്ഞൂറു രൂപയേ വരൂവത്രേ. ഫെബ്രുവരി മൂന്നിനു തിരുപ്പതിയില്‍ നടക്കുന്ന ചടങ്ങില്‍ പുതിയ ലാപ്‌ടോപ്പിനെ ഔദ്യോഗികമായി അവതരിപ്പിക്കുമെന്നാണു വാര്‍ത്ത. (വാര്‍ത്താകേരളം ഡോട്ട് കോമില്‍) തിരുപ്പതിയിലെ സെമികണ്ടക്ടര്‍ കോംപ്ളക്സുമായി സഹകരിച്ചായിരിക്കും ഈ കുഞ്ഞന്‍ പിറക്കുക. 2 ജി.ബി മെമ്മറി (എക്സ്പാന്‍ഡബിള്‍), വൈഫൈ, ഈതര്‍നെറ്റ് സൌകര്യങ്ങളോടയാണു പുത്തന്‍കൂറ്റുകാരന്‍റെ വരവ്. 2 വാട്സ് പവറിലായിരിക്കും പുതിയ ലാപ്‌ടോപ് പ്രവര്‍ത്തിക്കുക. ഇക്കാരണത്താല്‍ താരതമ്യേന വോള്‍ട്ടേജ് കുറവ് അനുഭവപ്പെടുന്ന ഗ്രാമപ്രദേശങ്ങളില്‍ ഇതു സുഗമമായി പ്രവര്‍ത്തിപ്പിക്കാനാവും. സോളാര്‍ വൈദ്യുതിയോ ഡൈനമയോ ഉപയോഗിച്ചു സിസ്റ്റം പ്രവര്‍ത്തിപ്പിക്കുന്ന കാര്യത്തിലും ഗവേഷണം നടക്കുന്നുണ്ട്. അതുകൂടി ശരിയായാല്‍ ആനന്ദലബ്ധിക്കിനിയെന്തു വേണം?

ഒരു ലാവ്‌ലിന്‍ കുലംകുത്തി

കാന്‍സര്‍ സെന്‍ററിനു കാശ് കിട്ടിയോ എന്നറിയില്ല. ഭെല്ലിനെ മറികടന്ന് വിദേശത്തെ എസ്എന്‍സി ലാവ്‌ലിന്‍ എന്ന ഭീമനുമായി കരാറുണ്ടാക്കിയതിലൂടെ സര്‍ക്കാരിനു വന്‍ നഷ്ടമുണ്ടായെന്ന കണ്ടെത്തലും ഞങ്ങള്‍ക്കു പ്രശ്നമല്ല. തെരഞ്ഞെടുപ്പുകാലത്ത് കേസ് കുത്തിപ്പൊക്കാന്‍ കോണ്‍ഗ്രസ് ശ്രമിക്കുന്നതു ശരിയാണോയെന്നതു മാത്രമാണു ചോദ്യം. പിണറായി വിജയനെ സംരക്ഷിക്കാന്‍ അരയും തലയും മുറുക്കിയിറങ്ങിയിരിക്കുന്ന സിപിഎം സംസ്ഥാന ഘടകത്തിന്‍റെയും പോളിറ്റ് ബ്യൂറോയുടെയും നിലപാടുകളാണു പറഞ്ഞത്. അല്ലാതെ എന്‍റെയല്ല.
തെരഞ്ഞെടുപ്പു മുന്നില്‍ക്കണ്ട് കളികള്‍ ഏറെ കളിക്കുന്നവരാണു കോണ്‍ഗ്രസുകാരെന്നത് പുതിയ കാര്യമൊന്നുമല്ല. മദ്രസപഠനത്തെ മതേതര രാഷ്ട്രത്തിലെ ഔദ്യോഗിക പഠനമാക്കിയതു തന്നെ ഉദാഹരണം. അതു പോട്ടെ. വിഷയം വേറെയാണ്. ലാവ്‌ലിനെയും അങ്ങനെയാണു കോണ്‍ഗ്രസ് കാണുന്നതെന്നാണ് സിപിഎമ്മിന്‍റെ ആരോപണം. ബുദ്ധിജീവികളും പുരോഗമന വാദികളുമടക്കം വാക്കു കൊണ്ടും വാളുകൊണ്ടും പോരാടാന്‍ ആളിനു പഞ്ഞമില്ലാത്ത പാര്‍ട്ടിക്ക് എന്തു പറ്റിയെന്നറിയില്ല. പ്രതികരിക്കാനെത്തുന്നവരെല്ലാം ഒരു തരം മന്ദത ബാധിച്ചവരെപ്പോലെ. കണ്ണടച്ചാല്‍ ഇരുട്ടാകുമെന്ന ധാരണയിലാണു പുലമ്പലേറെയും. പിണറായി കുറ്റക്കാരനാണെങ്കില്‍ ശിക്ഷിക്കപ്പെടട്ടെ. അല്ലെങ്കില്‍ അതു കോടതിയില്‍ തെളിയിക്കട്ടെ. ഇങ്ങനെയൊരു നിലപാടെടുക്കുന്നതല്ലേ ഇടതുപക്ഷത്തെ ശക്തമായ പാര്‍ട്ടിക്കു നല്ലത്?
അതിനു പകരം കോണ്‍ഗ്രസിനെ മെക്കിട്ടു കേറിയിട്ടു കാര്യമുണ്ടോ? മായാവതിക്കെതിരേ അന്വേഷണം തുടങ്ങിയത് അവര്‍ യുപിഎയ്ക്കുള്ള പിന്തുണ പിന്‍വലിച്ചതു കൊണ്ടാണെന്നും, മുലായത്തിനെതിരായ അന്വേഷണം നിര്‍ത്തിയത് അദ്ദേഹം പിന്തുണ നല്‍കിയതുകൊണ്ടാണെന്നും ചൂണ്ടിക്കാട്ടിയാണു കോടിയേരിസഖാവ് ഉള്‍പ്പെടെയുള്ളവര്‍ പടയൊരുക്കം നടത്തുന്നത്. ആണവകരാറിനെച്ചൊല്ലി ഇടതുപക്ഷം പിന്തുണ പിന്‍വലിച്ചതിനു പ്രതികാരമാണത്രേ പിണറായിക്കെതിരായ അന്വേഷണം. (തെളിവു ഞങ്ങള്‍ക്കു പ്രശ്നമല്ല).അപ്പോള്‍ കുറേക്കാലമായി ലാവ്‌ലിന്‍ കേസ് അട്ടത്തിരുന്നതു പിന്തുണക്കാരെ സംരക്ഷിച്ചതുകൊണ്ടാണോയെന്നു കൂടി വ്യക്തമാക്കേണ്ടിവരും. അതു വരും ദിവസങ്ങളിലറിയാം.
ഈ വാചകക്കസര്‍ത്തുകളില്‍ ഏറെ ഇഷ്ടപ്പെട്ടത് ഇതൊന്നുമല്ല. ഒരു മുന്‍മന്ത്രിയെ പ്രതിയാക്കാന്‍ അനുമതി തേടിയെന്നേ വാര്‍ത്ത വന്നിരുന്നുള്ളൂ. അതു പിണറായിയാണെന്ന് ആരും പറയുകയോ അറിയുകയോ ചെയ്തിരുന്നില്ല. അപ്പോഴാണു കോടിയേരി ബാലകൃഷ്ണന്‍ ഇക്കാര്യം വെട്ടിത്തുറന്നു പറഞ്ഞത്. അതോടെ സംഗതി നാറി. പിണറായി തന്നെ കക്ഷിയെന്നു നാട്ടില്‍ പാട്ടായി. ലാവ്‌ലിന്‍റെ നാള്‍വഴി വാര്‍ത്താകേരളത്തിലുണ്ട്. അതൊന്നു നോക്കിയാലറിയാം കേസ് തുടങ്ങിയത് യുപിഎയ്ക്കുള്ള പിന്തുണ പിന്‍വലിച്ച ശേഷമാണോയെന്ന്. ഏതായാലും സഖാക്കള്‍ വിഷമിക്കേണ്ട. ഇതൊന്നും നമ്മെ ബാധിക്കില്ല. ഒഞ്ചിയവും ഷൊര്‍ണൂരും കഴിഞ്ഞ് അമ്പലപ്പുഴയിലും ചില കുലംകുത്തികളിറങ്ങിയിട്ടുണ്ടല്ലോ. മാധ്യമശ്രദ്ധ മാറ്റാന്‍ എന്തെങ്കിലും പൊടിക്കൈ ആലോചിക്കാം. ലാവ്‌ലിന്‍ പൊങ്ങിവരുമ്പോഴൊക്കെ പതിവുള്ളതാണല്ലോ അത്.

സ്കൂളുകള്‍ പൂട്ടാം, മതപാഠശാല തുടങ്ങാം

വര്‍ഗീയത പറയുകയാണെന്നു വിചാരിക്കരുത്. എന്താ ഈ സര്‍ക്കാരിന്‍റെ ഉദ്ദേശ്യം? ഒരു സാധാരണ ഇന്ത്യക്കാരനെന്ന നിലയില്‍ ചോദിച്ചു പോവുകായാണ്. മദ്രസ വിദ്യാഭ്യാസം സര്‍ക്കാര്‍ ജോലി കിട്ടാനുള്ള യോഗ്യതയാക്കുകയാണത്രേ. വെറുതേയങ്ങു പറയുകയല്ല. കേന്ദ്ര മന്ത്രി അര്‍ജുന്‍സിംഗാണു പ്രഖ്യാപനം നടത്തിയിരിക്കുന്നത്.വാര്‍ത്താകേരളം ഡോട്ട്കോമില്‍ വാര്‍ത്തയുണ്ട്) സിബിഎസ്ഇ എന്ന വരേണ്യവര്‍ഗ വിദ്യാഭ്യാസത്തിന്‍റെ തത്തുല്യ പദവി മദ്രസാപഠനത്തിനു കൊടുക്കാനാണു തീരുമാനം. ഇനി മുതല്‍ അറബിയും ഖുറാനും പഠിച്ചാല്‍ സര്‍ക്കാര്‍ ജോലിക്ക് അപേക്ഷിക്കാന്‍ യോഗ്യതയാകുമെന്നു സാരം. അങ്ങനെ ചിന്തിക്കുമ്പോള്‍ സണ്‍ഡേ സ്കൂളുകളില്‍ ഗീതാക്ലാസുകളിലും പഠിക്കുന്നവര്‍ക്കും ഇതേ അവസരം നല്‍കേണ്ടതല്ലേയെന്നു തോന്നിപ്പോയത് വര്‍ഗീയതയാണെങ്കില്‍ ഞാന്‍ തികഞ്ഞ വര്‍ഗീയവാദിയാണെന്നു കൂട്ടിക്കോളൂ. മുസ്‌ലിം സമുദായത്തിന്‍റെ സാമൂഹികമായ ഉന്നതിയാണു സര്‍ക്കാരിന്‍റെ ലക്ഷ്യമെങ്കില്‍ ഇതാണോ ചെയ്യേണ്ടത്? മതപഠന ക്ലാസുകളില്‍ മാത്രം കുട്ടികളെ വിടുന്ന വിദ്യാഭ്യാസമില്ലാത്ത മാതാപിതാക്കളെ ബോധവത്കരിച്ച് ആ കുട്ടികളെക്കൂടി നിലവാരമുള്ള വിദ്യാഭ്യാസ രീതിയിലേക്ക് എത്തിക്കുകയല്ലേ വേണ്ടത്? (നിലവാരം എന്ന പദത്തെച്ചൊല്ലി തര്‍ക്കം വേണ്ട. പൊതു വിദ്യാഭ്യാസം എന്നേ ഉദ്ദേശിച്ചുള്ളു). അതിനു പകരം പിന്നോക്കം നില്‍ക്കുന്നവരെ കൂടുതല്‍ പിന്നോക്കം നയിക്കുന്നതല്ലേ ഈ സര്‍ക്കാര്‍ നയമെന്നാണ് ഈയുള്ളവന്‍റെ സംശയം. അതാണു സത്യവും. അപ്പോള്‍പ്പിന്നെ സര്‍ക്കാരിന്‍റെ തീരുമാനത്തിനു പിന്നില്‍ എന്താണെന്നു വ്യക്തമല്ലേ. ആസന്നമായ തെരഞ്ഞെടുപ്പ്. അതില്‍ വോട്ടുബാങ്കായിക്കാണുന്ന മത മൌലികവാദികളുടെ വോട്ട് ഒന്നുപോലും ചോരാതെ പെട്ടിയില്‍ വീഴണം. മത മൌലിക വാദത്തിന്‍റെ തെറ്റായ മാര്‍ഗത്തിലേക്കു പുതുതലമുറ വഴുതിവീഴാതെ സൂക്ഷിക്കേണ്ട സര്‍ക്കാര്‍ തന്നെയാണു മൌലികവാദത്തിന് ഔദ്യോഗിക ഭാഷ്യം ചമയ്ക്കുന്നത്. ഇവിടെയാണു ഞാന്‍ ആദ്യം പറഞ്ഞ വാചകം പ്രസക്തമാകുന്നത്. സര്‍ക്കാരിന്‍റെ തീരുമാനത്തിനെതിരേ സംഘപരിവാറും ബിജെപിയും രംഗത്തെത്തുമെന്നതില്‍ തര്‍ക്കമില്ല. അതിന് അവരെ നമുക്കു പരമാവധി കുറ്റപ്പെടുത്താം. ഞാന്‍ സംഘപരിവാറൊന്നുമല്ല.(ഇത് ആവര്‍ത്തിച്ചു പറഞ്ഞാല്‍പ്പോലും ഞാന്‍ സംഘപരിവാറിന്‍റെ വക്താവായി ചിത്രീകരിക്കപ്പെടാന്‍ ഈ ഒരു കുറിപ്പു മതിയെന്ന് അറിയാതല്ല.) പക്ഷേ, സംഘപരിവാറോ ബിജെപിയോ ഇല്ലായിരുന്നെങ്കില്‍ ഇവിടെ എന്തെല്ലാം നടക്കുമായിരുന്നു എന്ന ആശങ്ക അസ്ഥാനത്താണോ? ഇനിയിപ്പോള്‍ സംഘപരിവാറില്ലാത്ത ഇന്ത്യയെക്കുറിച്ചു ചിന്തിക്കാം. ഇവിടെ എന്തൊക്കെയാണു സംഭവിക്കുക. പെണ്‍കുട്ടികളെ സ്കൂളില്‍ വിട്ടാല്‍ തട്ടിക്കളയുമെന്നു പെഷവാറിലും സ്വാതിലും താലിബാന്‍ ഭീഷണി മുഴക്കിക്കൊണ്ടിരിക്കുന്ന കാര്യം തന്നെയെടുക്കുക. ഇവിടെയും അവരെ മനസാ അംഗീകരിക്കുന്നവരുണ്ടെന്ന സത്യവും മറക്കാതിരിക്കുക. പുറമേ പറയുന്നില്ലെങ്കിലും അവരുടെ നടപടികള്‍ ശരിയെന്നു കരുതുന്ന എത്രയോ പേരുണ്ടാകാം. അവരെ പിന്തുണച്ച് മത പോലീസും നിര്‍ബന്ധിത പര്‍ദയും ശരിയത്ത് നിയമവും നടപ്പാക്കാന്‍ കോണ്‍ഗ്രസ് തയാറാവില്ലേ? പ്രീണനം അതിരില്ലാതെ തുടരുമ്പോഴും അതിന് അല്പമെങ്കിലും വിഘാതമായി നില്‍ക്കുന്നതു സംഘപരിവാറിന്‍റെ ഇടപെടലുകളല്ലേ? ഹമാസ് ഭീകരര്‍ നടത്തുന്ന എല്ലാ അതിക്രമങ്ങളെയും മറച്ചു വച്ച് ഇസ്രായേലിനെ മാത്രം പഴിക്കുന്നതും പ്രീണനത്തിന്‍റെ ഭാഗമാണെന്നു പറഞ്ഞാല്‍, പറയുന്നവന്‍ വര്‍ഗീയവാദിയാകും. പണ്ടു പത്താംക്ലാസ് പരീക്ഷയെഴുതാന്‍ പോയിരുന്നതാണ് ഓര്‍ക്കുന്നത്. അന്നൊക്കെ ഒരു ബുധനാഴ്ച തുടങ്ങി അടുത്ത ബുധനാഴ്ച തീരുന്ന വിധത്തിലായിരുന്നു എസ്എസ്എല്‍സി പരീക്ഷ. മതേതരത്വത്തിന്‍റെ വക്താക്കളായ കോണ്‍ഗ്രസാണ് അതു മാറ്റിയത്. ആന്‍റണി മുഖ്യമന്ത്രിക്കസേര ഒഴിയുന്നതിനു തൊട്ടുമുമ്പു പരീക്ഷാ ദിവസങ്ങളൊന്നു പരിഷ്കരിച്ചു. വെള്ളിയാഴ്ച പരീക്ഷ വേണ്ടത്രേ. അന്നു മുസ്ലിങ്ങള്‍ക്കു പള്ളിയില്‍ പോകേണ്ടതാണെന്നു ന്യായം. അതു വരെ എങ്ങനെയായിരുന്നു പരീക്ഷാര്‍ഥികള്‍ പള്ളിയില്‍ പോയിരുന്നതെന്ന ചോദ്യത്തിനു പ്രസക്തിയില്ല.ഇതാണു മതേതരത്വം. പണ്ടു മലപ്പുറം ജില്ല സൃഷ്ടിച്ചു കൊടുത്ത ഇടതു പുരോഗമന വാദികളും വ്യത്യസ്തമല്ലല്ലോ. സംഘടിതമതത്തെ വോട്ടിനു വേണ്ടി ഉപയോഗിക്കുകയും അതിനു പ്രീണനം മാര്‍ഗമാക്കുകയും ചെയ്യുന്നതില്‍ ആരും പിന്നോക്കമല്ലെന്നു പറഞ്ഞെന്നേയുള്ളൂ. ഇതെല്ലാം കാണുമ്പോള്‍ അറിയാതെ പറഞ്ഞു പോയതാണ്. ദൈവമേ, ഈ സംഘപരിവാറുകൂടി ഇല്ലായിരുന്നെങ്കില്‍?

ജനം ക്യൂ നിന്നു, ലക്ഷാധിപതികളെ കോടീശ്വരരാക്കാന്‍

രണ്ടു ദിവസം രാജ്യം ക്യൂ നില്‍ക്കുകയായിരുന്നു. ലക്ഷാധിപതികളായ ചുരുക്കം ചില പൊതുമേഖലാ ജീവനക്കാരെ കോടീശ്വരന്‍മാരാക്കാന്‍. ശമ്പളക്കൂടുതല്‍ ആവശ്യപ്പെട്ട് എണ്ണക്കമ്പനി ജീവനക്കാര്‍ നടത്തിയ സമരവും തുടര്‍ന്നു ട്രക്കുടമകള്‍ നടത്തിയ സമരവും വലച്ചതു സര്‍ക്കാരിനെയല്ല. സാധാരണ ജനങ്ങളെത്തന്നെ.

സമരം മൂന്നു ദിവസംകൊണ്ടു പിന്‍വലിക്കേണ്ടി വന്നതു ജനവികാരം എതിരായെന്ന തിരിച്ചറിവിലാണ്. രണ്ടാം നാള്‍ മുതല്‍ പെട്രോളും ഡീസലും കിട്ടാനില്ലാതെ ആയിരങ്ങള്‍ വലഞ്ഞപ്പോഴാണു സര്‍ക്കാരിനും ശക്തമായി പ്രതികരിക്കാന്‍ ആര്‍ജവമുണ്ടായത്. എന്തിനായിരുന്നു എണ്ണക്കമ്പനി ജീവനക്കാരുടെ സമരം. അന്നന്നത്തെ അന്നത്തിനു വകയില്ലാതെ വലയുന്ന ലക്ഷങ്ങളുള്ള രാജ്യത്ത് നടത്തുന്ന സമരങ്ങള്‍ക്ക്, അത് ആരു നടത്തിയാലും, നീതീകരണമുണ്ടാകണം. ഇവിടെ ഇല്ലാത്തതും അതു തന്നെ. എണ്ണക്കമ്പനികളിലെ ട്രെയിനിക്കു കിട്ടുന്ന ശമ്പളം പ്രതിമാസം 25000 രൂപയാണ്. തസ്തിക വലുതാകുംതോറും ശമ്പളം ലക്ഷവും കടന്ന് മുന്നേറും. 145000 രൂപ വരെ ശമ്പളമുള്ള ജീവനക്കാരാണു സമരത്തിനിറങ്ങിയതെന്നു സര്‍ക്കാര്‍ തന്നെ സാക്ഷ്യപ്പെടുത്തുമ്പോഴാണു നീതീകരണമെന്ന വാക്കിന്‍റെ അര്‍ഥത്തെക്കുറിച്ചു സാധാരണക്കാരന്‍ ചിന്തിക്കേണ്ടിവരുന്നത്. ഇവര്‍ക്കെതിരേ നടപടിയെടുത്താല്‍ ജനങ്ങള്‍ കൂടെ നില്‍ക്കുമെന്ന രണ്ടു ദിവസത്തെ പ്രതികരണം സര്‍ക്കാരിനു ബോധ്യമാക്കിയിട്ടുണ്ടാകാം. അതാണു കടുത്ത നിലപാടുകളിലൂടെ സമരത്തെ അടിച്ചമര്‍ത്താന്‍ ഭരണാധികാരികളെ പ്രേരിപ്പിച്ചത്.

ഇതിനിടെ, സമരത്തിനു പിന്നില്‍ മറ്റു ചില ലക്ഷ്യങ്ങളുള്ളതായും സൂചനയുണ്ട്. ക്രൂഡോയില്‍ വിലവര്‍ധനയെത്തുടര്‍ന്ന് അടച്ചിട്ട സ്വകാര്യ എണ്ണക്കമ്പനികള്‍ക്കു ലാഭം കൊയ്യാന്‍ ആഗോള വിലനിലവാരം താഴ്ന്ന സാഹചര്യം അവസരമൊരുക്കുന്നുണ്ട്. ഇതിനു യോജിച്ച കളമൊരുക്കുകയായിരുന്നു സമരക്കാരെന്ന സംശയം തീര്‍ത്തും തള്ളിക്കളയാവുന്നതല്ല. കൂടുതല്‍ വിവരങ്ങള്‍ വാര്‍ത്താകേരളം ഡോട്ട്കോമില്‍.

രണ്ടായിരത്തി ഒമ്പതാമാണ്ടിലേക്ക്

വീണ്ടുമൊരു പുതുവര്‍ഷപ്പുലരി. വിഹ്വലതകളുടെയും ഭീകരാക്രമണങ്ങളുടെയും ജിഹാദി ഭീഷണിയുടെയും ജനാധിപത്യത്തിനു മേല്‍ പിടിമുറുക്കുന്ന അധികാരരാഷ്ട്രീയത്തിന്‍റെയും നിഴലില്‍, മനുഷ്യകുലം സ്വയം സൃഷ്ടിച്ച കലണ്ടറില്‍ മറ്റൊരു ക്രിസ്തുവര്‍ഷം കൂടി പിറക്കുന്നു. ആഗോള സാമ്പത്തിക മാന്ദ്യവും അതിലേറെ ഭീതിജനകമായ മതഭീകരവാദവും അലങ്കോലപ്പെടുത്തിയ മനസുമായാണു പുതിയ വര്‍ഷത്തെ ലോകം വരവേല്‍ക്കുന്നത്.
ക്രിസ്തുവര്‍ഷത്തിന്‍റെ കണക്കുപുസ്തകത്തില്‍ 2009 വര്‍ഷം. അതിനുമെത്രയോ മുമ്പു തന്നെ നിലനിന്ന സമഭാവനയുടെ സംസ്കാരത്തെ അതിന്‍റെ എല്ലാ അര്‍ഥത്തിലും നെഞ്ചേറ്റിയ ഭാരതപുത്രന്‍റെ ഇടനെഞ്ചിലേക്കു മുംബൈയില്‍ കടല്‍കടന്നെത്തിയ മതഭീകരര്‍ പായിച്ച വെടിയുണ്ടകള്‍ക്കു സഹനത്തിന്‍റെയും സ്നേഹത്തിന്‍റെയും ദിവ്യമന്ത്രങ്ങള്‍ അന്യമായിരുന്നു. അന്നു പൊലിഞ്ഞ ആത്മാവുകള്‍ക്കു നിത്യശാന്തി നേരാം. ഭീകരരോടേറ്റുമുട്ടി വീരചരമം പ്രാപിച്ച ഭാരതമക്കളുടെ സ്മരണയ്ക്കു മുന്നില്‍ പ്രണാമം അര്‍പ്പിക്കാതെ പുതുവര്‍ഷത്തെ വരവേല്‍ക്കാനാവില്ല. നിരപരാധികളായ മനുഷ്യജീവനെ ഏതോ കാടത്തം നിറഞ്ഞ മനസുകള്‍ സൃഷ്ടിച്ച തെറ്റായ വ്യാഖ്യാനത്തെ ശരിയെന്നു തെറ്റിദ്ധരിച്ചു തല്ലിക്കൊഴിച്ച ദിനങ്ങളാണ് കടന്നു പോയ വര്‍ഷത്തിന്‍റെ അവസാന പാദത്തിലുണ്ടായത്. ഇരുള്‍ മൂടിയ കാലത്തിന്‍റെ മേല്‍ക്കൂരയ്ക്കിടയില്‍ ഇപ്പോഴും വെളിച്ചത്തിനു കടന്നു വരാന്‍ ഇടമുണ്ട്. ആ വെളിച്ചത്തെ ഉള്ളിലേക്ക് ആവാഹിക്കാം. ഏവര്‍ക്കും പുതുവത്സരാശംസകള്‍.

ചൂടുതേടിപ്പോയാല്‍ അഴിയെണ്ണാം

ചൂടന്‍ രംഗങ്ങള്‍ തേടി ഇന്‍റര്‍നെറ്റില്‍ പരതുന്നവരേ. നിങ്ങളെ കാത്തിരിക്കുന്നതു കൈവിലങ്ങും ജയിലഴികളും. കഴിഞ്ഞ ലോക്‌സഭാ സമ്മേളനത്തില്‍ തിടുക്കപ്പെട്ടു പാസാക്കിയ വിവരസാങ്കേതിക നിയമ ഭേദഗതി ബില്‍ പ്രകാരം അശ്ലീല സൈറ്റുകള്‍ പരതുന്നതു മാത്രമല്ല കുറ്റം. ആരെങ്കിലും ഇ-മെയില്‍ പാസ്‌വേഡ് അടിച്ചു മാറ്റി എന്തെങ്കിലും കുറ്റകരമായ മെയില്‍ അയച്ചാലും അകത്താവുക യഥാര്‍ഥ ഉടമയാകും. വൈറസ് കയറിയ കമ്പ്യൂട്ടറില്‍ ചിലപ്പോള്‍ മനസറിയാതെ കടന്നെത്തുന്ന അശ്ലീല ചിത്രങ്ങളും നിങ്ങളെ കുടുക്കും. സംശയം തോന്നുന്നവരുടെ വീട്ടില്‍ അനുവാദമോ വാറന്‍റോ ഇല്ലാതെ എസ്ഐ മുതലുള്ള പോലീസുകാര്‍ക്ക് യഥേഷ്ടം പ്രവേശിക്കാം. കാര്യമായ ചര്‍ച്ചയൊന്നുമില്ലാതെ പാസാക്കിയ ബില്‍ പ്രകാരം അശ്ലീല ചിത്രമോ വീഡിയോയോ കാണുന്നവര്‍ക്ക് അഞ്ചു മുതല്‍ ഏഴു വര്‍ഷം വരെ തടവും പത്തുലക്ഷം രൂപവരെ പിഴയും ശിക്ഷയും ലഭിക്കും. കമ്പ്യൂട്ടറുടമ അറിയാതെ ഇന്റര്‍നെറ്റിലെ അശ്ളീലചിത്രങ്ങള്‍ മറ്റാരെങ്കിലും കണ്ടു രസിച്ചാലും അഴിയെണ്ണുക ഉടമ തന്നെ. മിക്കവാറും ചെറുപ്പക്കാര്‍ പിള്ളേര്‍ ഇന്‍റര്‍നെറ്റ് ഉപേക്ഷിക്കാനുള്ള സാധ്യത കാണുന്നുണ്ട്. കൂടുതല്‍ അറിയണമെന്നുള്ളവര്‍ വാര്‍ത്താകേരളം ഡോട്ട്കോം തിരയൂ.

കണ്ടു പഠിക്കൂ സാര്‍ ബഹന്‍ജിയെ

ഉത്തര്‍പ്രദേശില്‍ നിന്നാണു പുതിയ വാര്‍ത്ത. അവിടത്തെ പൊതുമരാമത്ത് വകുപ്പിലെ ഒരു എന്‍ജിനീയറായ മനോജ് ഗുപ്തയെ ഭരണകക്ഷി എംഎല്‍എ ശേഖര്‍ തിവാരിയുടെ നേതൃത്വത്തില്‍ തല്ലിക്കൊന്നു. രാത്രി വീട്ടില്‍ നിന്നു വിളിച്ചിറക്കിയായിരുന്നു കൊലപാതകം. മുഖ്യമന്ത്രിയും ബിഎസ്‌പി നേതാവുമായ മായാവതിയുടെ ജന്മദിനാഘോഷത്തിനു പിരിവു നല്‍കാന്‍ വിസമ്മതിച്ചതാണത്രേ കൊലപാതകത്തിലെത്തിയത്.
പാവം എന്‍ജിനീയര്‍. അയാള്‍ക്ക് എന്തെങ്കിലും കൊടുത്ത് തെണ്ടാനെത്തിയ രാഷ്ട്രീയപരിഷകളെ ഒഴിവാക്കിക്കൂടായിരുന്നോ എന്നു ചിന്തിക്കുന്നെങ്കില്‍ തെറ്റി. എത്ര തുകയാകാം അദ്ദേഹത്തോടു ചോദിച്ചിരിക്കുകയെന്നത് ഇനിയും വെളിപ്പെട്ടിട്ടില്ല. ഏതായാലും ജന്മദിനത്തിനു തന്‍റെ അക്കൌണ്ടില്‍ ആയിരം കോടി രൂപ എത്തിക്കണമെന്നായിരുന്നത്രേ പാര്‍ട്ടി നേതാവായ മായാവതിയുടെ കല്പന. അക്കണക്കിനു പൊതുമരാമത്ത് എന്‍ജിനീയറോടു ചോദിച്ചിരിക്കുക നിസാര തുകയാവാന്‍ തരമില്ല. ഏതായാലും ശേഖര്‍ തിവാരി അകത്താണ്. അധികം വൈകാതെ പുറത്തിറങ്ങിയാലും അതിശയിക്കേണ്ട. മായാവതി പറഞ്ഞിട്ടുണ്ട് തന്‍റെ അധീനതയിലുള്ള പോലീസ് കേസ് അന്വേഷിക്കുമെന്ന്. പോരേ ജനാധിപത്യം.
ഇതേ ദിവസം തന്നെയാണു കേരളത്തില്‍ പുരോഗമനപരമായ ഒരു പ്രസ്താവനയുമായി ഒരു നേതാവെത്തിയത്. ബിഎസ്‌പിയിലേക്കു ചേക്കേറിയ നമ്മുടെ പഴയ നളിനി നെറ്റോ ഫെയിം നീലന്‍ തന്നെ. സാമൂഹ്യ നീതി നടപ്പാക്കുന്നതു കാണാന്‍ ഉത്തര്‍പ്രദേശിലേക്കു നോക്കണമെന്നും ഇവിടെ നിന്ന് ആരെങ്കിലുമൊക്കെ അവിടെപ്പോയി അതു കണ്ടു പഠിക്കണമെന്നുമാണു നീലന്‍റെ ആവശ്യം. ബഹുജോര്‍.
ഇപ്പോഴിവിടെ അത്യാവശ്യം തല്ലിപ്പൊളിത്തരമൊക്കെയേ രാഷ്ട്രീയക്കാര്‍ കാണിക്കുന്നുള്ളൂ. കേരളത്തിലെ ജനങ്ങളെ അവര്‍ക്ക് അല്പം ഭയമുണ്ട്. പത്രങ്ങളിലെ ഒരു വിഭാഗത്തെ ഭയക്കുകയും വേണം. അഭയയെ കൊന്നവരെ രക്ഷിക്കാന്‍ പ്രാര്‍ഥനായജ്ഞം നടത്തുന്നവരോ, കാശ്മീര്‍ ബന്ധമുള്ളവരെ കണ്ടെത്താനുള്ള ശ്രമം നിര്‍ത്തി കണ്ണൂരില്‍ ബോംബ് പിടിച്ചു മാധ്യമശ്രദ്ധ മാറ്റാന്‍ പറഞ്ഞവരോ അതുമല്ലെങ്കില്‍ എംആര്‍ മുരളിക്കെതിരേ വിജിലന്‍സ് അന്വേഷണം പ്രഖ്യാപിച്ചവരോ ഒക്കെയേ ഇപ്പോഴുള്ളൂ.
ഉത്തര്‍പ്രദേശില്‍ പോയി നീലന്‍റെ നേതാവിന്‍റെ പ്രവര്‍ത്തനരീതി പഠിച്ചു നടപ്പാക്കാന്‍ തുടങ്ങിയാല്‍ എന്താകും സ്ഥിതി? ഏതായാലും അങ്ങനെയാരെങ്കിലും പഠനാര്‍ഥം യുപിയിലേക്കു പോകുന്നുണ്ടെങ്കില്‍ അവര്‍ തിരികെയെത്തുംമുമ്പു നാടു വിടണമെന്നാണ് ആലോചിക്കുന്നത്.

കൂട്ടുകൂടി നടക്കാം, പാട്ടും പാടി ജീവിക്കാം

കമ്പനി കൂടി നടന്നു ചീത്തയാകരുതെന്നു കുട്ടികളെ ഉപദേശിക്കാന്‍ വരട്ടെ. അതു പഴയ ചിന്ത. സുഹൃദ് വലയം വിപുലമാന്നതിലൂടെ നിങ്ങളെ കാത്തിരിക്കുന്നതു സന്തോഷം നിറഞ്ഞ ജീവിതമാണെന്നാണു പുതിയ കണ്ടെത്തല്‍. ( വിശദാംശങ്ങള്‍ വാര്‍ത്താകേരളം ഡോട്ട്കോമില്‍) രണ്ടു പേരായാല്‍ ഒരു കമ്പനി, മൂന്നു പേരായാല്‍ ആള്‍ക്കൂട്ടം എന്ന പഴയ സിദ്ധാന്തം വലിച്ചെറിയാം.

കുറഞ്ഞതു പത്തു സുഹൃത്തുക്കളുമായെങ്കിലും കമ്പനി കൂടുന്നതു സന്തോഷത്തിന്‍രെ വാതായനങ്ങള്‍ തുറന്നു തരുമെന്നാണു മനശാസ്ത്ര ഗവേഷകരുടെ കണ്ടുപിടിത്തം. അഞ്ചോ അതിലും താഴെയോ സുഹൃത്തുക്കള്‍ മാത്രമുള്ളവരാകട്ടെ എക്കാലവും മാനസിക ദുരിതങ്ങള്‍ പേറുന്നവരാകുമെന്നും അവര്‍ പറയുന്നു. സംഗതി സായിപ്പിന്‍റെ നാട്ടിലെ കണ്ടു പിടിത്തമാണെങ്കിലും നമുക്കും കുറേയൊക്കെ ഇതു ബാധകമായേക്കാം. പ്രത്യേകിച്ചും മാറിവരുന്ന ജീവിത സാഹചര്യങ്ങളില്‍.

ഗവേഷകര്‍ നമ്മുടെ നാട്ടില്‍ ചിലര്‍ ചെയ്യുന്നതുപോലെ വീട്ടിലിരുന്നു കണക്കുകൂട്ടി കണ്ടുപിടിച്ചതൊന്നുമല്ല ഇത്. നൂറുകണക്കിനു സ്ത്രീപുരുഷന്‍മാരെ പഠനവിധേയരാക്കിയാണു നിഗമനത്തിലെത്തിയത്. സുഹൃത്തുക്കള്‍ നമ്മളെയാണോ നമ്മള്‍ സുഹൃത്തുക്കളെയാണോ സന്തോഷഭരിതരാക്കുന്നതെന്നു ചിന്തിക്കേണ്ട. എല്ലാവരും സന്തോഷത്തില്‍ത്തന്നെയാകുന്നു.

ഭീകരരെ പിടിക്കാന്‍ മുളകുപൊടി

നിരപരാധികളെ തോക്കിന്‍മുനയില്‍ ബന്ദികളാക്കി നിര്‍ത്തി സാമ്രാജ്യസൃഷ്ടിക്കിറങ്ങുന്ന ഭീകരര്‍ സൂക്ഷിക്കുക. നിങ്ങളെ തുരത്താന്‍ പുതുയ മാര്‍ഗം വരുന്നു. സംഗതി ലളിതമാണ്. നമ്മുടെ നാട്ടിന്‍പുറത്തെ കള്ളന്‍മാരുടെ പഴയ ആയുധം തന്നെ. മുളകുപൊടി. മുളകുപൊടി നിറച്ച ഗ്രനേഡുകളുമായിട്ടായിരിക്കും ഇനി ഭീകരവിരുദ്ധ സേന രംഗത്തിറങ്ങുക. ഏതു ഭീകരനായാലും മുളകുപൊടിക്കു മുന്നില്‍ പിടിച്ചു നില്‍ക്കാനാവില്ലല്ലോ. പറുദീസ വാഗ്ദാനം ചെയ്യുന്ന അദൃശ്യകരത്തിന്‍റെ ആശീര്‍വാദത്തോടെയാണു നിരപരാധികളെ കൊന്നൊടുക്കുന്നതെന്നാണല്ലോ ഭീകരരുടെ ജിഹാദി ന്യായം. മുളകുപൊടി മൂക്കിലും നെഞ്ചിലും അടിഞ്ഞുകൂടുമ്പോള്‍ ആയുധമെടുപ്പിച്ച ആ അദൃശ്യശക്തിയും തുണയാവില്ലെന്നറിയുക. പ്രതിരോധ ഗവേഷണ വിഭാഗമാണു പുതിയ ആയുധത്തിനു രൂപം നല്‍കുന്നത്. മുളകിന്‍റെ വീര്യം നിറഞ്ഞ പുക മാളത്തിലൊളിക്കുന്ന ഏതു ഭീകരനെയും പുറത്തു ചാടിക്കും. വാര്‍ത്താകേരളം ഡോട്ട് കോമില്‍ വാര്‍ത്ത പൂര്‍ണരൂപത്തിലുണ്ട്.

ഭീകരരെ നേരിടാന്‍ എന്തെല്ലാം ചെയ്യണം

അഭയക്കേസിലെ പ്രതികളെ നാര്‍ക്കോ അനാലിസിസിനു വിധേയമാക്കിയതു തെറ്റാണെന്നു വാദിക്കുന്നവര്‍ ബ്രിട്ടനിലേക്കു നോക്കുക. അവിടെ ഭീഷണിയാകുന്ന ഇസ്ലാമിക ഭീകരവാദത്തെ നേരിടാന്‍ പിടിയിലായ ഭീകരനേതാക്കളുടെ മനസു മാറ്റിയെടുക്കാനുതകുന്ന മനശാസ്ത്ര രീതികളാണ് തുടങ്ങിയിരിക്കുന്നത്. ആഗോള തലത്തില്‍ ഭീഷണിയാകുന്ന ഇസ്‌ലാമിക തീവ്രവാദത്തെ നേരിടാന്‍ ബ്രിട്ടനിലെ ജയിലുകളില്‍ രഹസ്യമായാണു പുതിയ പരീക്ഷണം നടത്തുന്നത്. ഇതേക്കുറിച്ചു വിശദമായ റിപ്പോര്‍ട്ട് വാര്‍ത്താകേരളം ഡോട്ട്കോമിലുണ്ട്.

ഭീകരപ്രവര്‍ത്തനവുമായി ബന്ധപ്പെട്ടു പിടിയിലായി ജയിലില്‍ കഴിയുന്ന ഇസ്ലാമിക തീവ്രവാദികളുടെ മനസിനെ മാറ്റാന്‍ ശാസ്ത്രീയമായി അവരുടെ മനസിനെ ഡിപ്രോഗ്രാമിംഗ് നടത്തുകയാണു മനശാസ്ത്രജ്ഞര്‍. മനസില്‍ അടിയുറച്ചിരിക്കുന്ന അന്ധമായ മതഭ്രാന്തിനെ തെറാപ്പിയിലൂടെ ഇല്ലാതാക്കാനാണു ശ്രമം.

കഴിഞ്ഞ ജനുവരിയില്‍ നീതിന്യായ മന്ത്രാലയം രൂപീകരിച്ച സ്പെഷല്‍ എക്സ്ട്രിമിസം യൂണിറ്റാണ് ഇതിനു മുന്‍കൈയെടുക്കുന്നത്. ബ്രിട്ടനിലെ ജയിലുകളില്‍ ഇസ്ലാമിക തീവ്രവാദം പടരുന്നതു തടയാനാണു ശ്രമം. വൈറ്റ്മൂര്‍ ജയിലിലെ മുസ്ലിം തടവുകാരില്‍ ഇതു പരീക്ഷിച്ചു തുടങ്ങിയിട്ടുണ്ട്. ഭീകരപ്രവര്‍ത്തനവുമായി ബന്ധപ്പെട്ട ഇപ്പോള്‍ 90 പേരാണു ജയിലിലുള്ളത്. ഇതു തുടര്‍ന്നാല്‍ ഇസ്ലാമിക സംഘടനകളുടെ ജിഹാദ് പ്രസ്ഥാനവും ഭീകരവാദവും വ്യാപിച്ചേക്കുമെന്ന ഭീതിയാണു ബ്രിട്ടനിലെ അധികൃതര്‍ക്കുള്ളത്. തടവുകാരില്‍ 11 ശതമാനം മുസ്ലിങ്ങളാണെന്നത് അവരുടെ ഭീതി ഇരട്ടിപ്പിക്കുന്നു.കൂടുതല്‍ വിവരങ്ങള്‍ വാര്‍ത്താകേരളത്തില്‍.

അഭയയോടില്ലാത്ത സ്നേഹം പ്രതികളോടോ?

വിവാദങ്ങളില്‍ നിന്നു വിവാദത്തിലേക്ക് ഏറെ യാത്ര ചെയ്താണ് ഒടുവില്‍ അഭയയുടെ ഘാതകരെക്കുറിച്ചു സൂചനകള്‍ പുറത്തു വന്നത്. രണ്ടു വൈദികരും ഒരു കന്യാസ്ത്രീയും പിടിയിലായി. ഇതോടെ കളം മാറുന്ന കാഴ്ചയാണു ചുറ്റും. നിരന്തരം തുടരുന്ന പ്രസ്താവനായുദ്ധങ്ങള്‍. പ്രാര്‍ഥനായോഗങ്ങള്‍, ഉപവാസ പ്രാര്‍ഥനകള്‍. ഏറ്റവുമൊടുവില്‍ അഭയക്കേസുമായി ബന്ധപ്പെട്ടു ക്രിസ്ത്യാനികളെ താറടിച്ചു കാണിക്കാന്‍ ചില പത്ര, ദൃശ്യ മാധ്യമങ്ങള്‍ ശ്രമിക്കുകയാണെന്ന ആരോപണവുമായി കെസിബിസി ജാഗ്രതാ കമ്മീഷന്‍ രംഗത്തെത്തിയിരിക്കുന്നു. സിനിമാല പോലുള്ള പരിപാടികളില്‍ വൈദികരെയും സന്യസ്തരെയും അവഹേളിക്കാന്‍ ശ്രമിച്ചതായാണ് ആരോപണം. സിനിമാല എന്നത് ഒരു ഹാസ്യപരിപാടിയാണ്. ഇതില്‍ പലരെയും പല സന്ദര്‍ഭങ്ങളിലും വിമര്‍ശിച്ചിട്ടുണ്ടു താനും. അവരാരും ഇത്തരം പ്രസ്താവനയുമായി രംഗത്തിറങ്ങിയിട്ടില്ല. സന്തോഷ് മാധവനെയും അമ്മ തായ എന്ന സ്ത്രീയെയും കുറിച്ചു സിനിമാല പരിപാടി അവതരിപ്പിച്ചിരുന്നു. അതിലെ ഹാസ്യം ആസ്വദിക്കുകയല്ലാതെ ഹിന്ദുക്കള്‍ക്കെതിരായ നീക്കമെന്ന ആരോപണവുമായി ആരെങ്കിലും രംഗത്തുവന്നതായി പറഞ്ഞുകേട്ടിട്ടുപോലുമില്ല. ളോഹയണിഞ്ഞ രണ്ടു പേരെ അനുകരിച്ചതോടെയാണു മതേതരത്വത്തിന്‍റെ ഭാഗമെന്നു ദിവസവും സ്വയം വിശേഷിപ്പിക്കുന്നവര്‍ പടയ്ക്കിറങ്ങുന്നത്. അഭയക്കേസ് ഒതുക്കാന്‍ തുടക്കം മുതലേ ഉന്നത തലത്തില്‍ ശ്രമമുണ്ടായിരുന്നെന്നതു രഹസ്യമല്ല. ആരൊക്കെയാണോ കേസ് ഒതുക്കാന്‍ ശ്രമിച്ചത്, അവര്‍ക്കെതിരേ തിരിയാന്‍ തുടങ്ങുന്നുവെന്നതാണു സിബിഐ ചെയ്യുന്ന തെറ്റ്. വിശദമായ വാര്‍ത്ത വാര്‍ത്താകേരളം ഡോട്ട് കോമില്‍

സൂക്ഷിക്കുക, ഫേസ്‌ബുക്കിലും വൈറസ്

ഫേസ്‌ബുക്കിലൂടെ സൌഹൃദം പങ്കിടുന്നവര്‍ സൂക്ഷിക്കുക. നിങ്ങളുടെ കംപ്യൂട്ടറില്‍ നിന്നു വിലയേറിയ ക്രെഡിറ്റ് കാര്‍ഡ് നമ്പരുകളുള്‍പ്പെടെയുള്ളവ തട്ടിയെടുക്കപ്പെട്ടേക്കാം. 'കൂബ്‌ഫേസ്' എന്നു പേരായ ഒരു വൈറസാണു വില്ലന്‍ വേഷത്തില്‍ ഫേസ്‌ബുക്കിലെ കൂട്ടായ്മയിലേക്കു നുഴഞ്ഞു കയറുന്നത്. ഫേസ്‌ബുക്കിലെ മെസേജുകളിലൂടെയാണു വൈറസ് രംഗപ്രവേശം ചെയ്യുന്നത്. പൊതുവേ, ഫേസ്‌ബുക്കിലൂടെയെത്തുന്ന മെസേജുകള്‍ വിശ്വസ്ത സുഹൃത്തുക്കളുടേതായതിനാല്‍ ആരും സംശയിക്കാതെ തുറക്കും. അതു തന്നെയാണു വൈറസുകളെ കടത്തിവിടുന്നവരുടെയും ലക്ഷ്യം. സോഷ്യല്‍ നെറ്റ്വര്‍ക്കിംഗ് സൈറ്റുകളില്‍ കടന്നുകയറുന്ന ഹാക്കര്‍മാരുടെ പുത്തന്‍ തന്ത്രമാണു ഫേസ്‌ബുക്കിലൂടെ പരക്കുന്നത്. ഇതു കൊണ്ടുപോകുന്നതു നിസാര ഡേറ്റകളൊന്നുമല്ല. ക്രെഡിറ്റ് കാര്‍ഡ് നമ്പരുകളുള്‍പ്പെടെയുള്ള സാമ്പത്തിക രംഗമാണു വൈറസിന്‍റെ വിളയാട്ടഭൂമി.... കൂടുതല്‍ വിവരങ്ങള്‍ വാര്‍ത്താകേരളം.കോമിലുണ്ട്. അല്ലെങ്കില്‍ ഇവിടെ ക്ലിക്ക് ചെയ്യുക.

ഒറ്റയാള്‍പ്പട്ടാളത്തിന് എന്തൊക്കെ ചെയ്യാനാവും?

ഒരു ഒറ്റയാള്‍പ്പട്ടാളത്തിന് എന്തൊക്കെ ചെയ്യാനാകും? ഒത്തിരി ആലോചിച്ചാല്‍ ചിലപ്പോള്‍‍ എന്തെങ്കിലുമൊക്കെ ഉത്തരം കിട്ടിയേക്കും. പക്ഷേ, ഒട്ടും ആലോചിക്കാതെ ഉത്തരം പറയണമെന്നുള്ളവര്‍ വാര്‍ത്താ വെബ്‌സൈറ്റായ വാര്‍ത്താകേരളം ഡോട്ട്കോം സന്ദര്‍ശിക്കുക.
ഒരാള്‍ ഒറ്റയ്ക്കു വാര്‍ത്തയും പരസ്യവും ചിത്രങ്ങളും ഫീച്ചറുകളും എന്തിനേറെ, അതിലുള്ളതെല്ലാം ചെയ്യുന്ന ലോകത്തെ ആദ്യ വാര്‍ത്താ വെബ്‌സൈറ്റാകും ഇത്. എന്നുകരുതി തട്ടിക്കൂട്ടാണു സംഗതിയെന്നു കരുതരുത്.
പക്കാ പ്രഫഷണല്‍ സൈറ്റു തന്നെ. രൂപഭംഗിയുടെയും ഉള്ളടക്കത്തിന്‍റെയും കാര്യത്തില്‍ മലയാള ഭാഷയിലുള്ള വാര്‍ത്താ വെബ്‌സൈറ്റുകളില്‍ മുന്‍പന്തിയിലാണു വാര്‍ത്താകേരളം. മറ്റു സൈറ്റുകളില്‍ പലതും പ്രമുഖ പത്രങ്ങളുടെ ഇന്‍റര്‍നെറ്റ് എഡിഷനുകളാണ്. അല്ലാതെ ചിലതുമുണ്ട്.
പക്ഷേ, എല്ലാം ആവശ്യത്തിനോ അതിലേറെയോ ജീവനക്കാരെ വച്ച് വന്‍കിട ഓഫീസ് സൌകര്യവും സാമ്പത്തികമൂലധനവുമൊക്കെയായി പ്രവര്‍ത്തിക്കുന്നവ. ഇതാണു വാര്‍ത്താകേരളത്തെ അവരില്‍ നിന്നെല്ലാം വ്യത്യസ്തമാക്കുന്നതും.
വായനാസുഖമുള്ള പലതും സൈറ്റില്‍ കാണാം. ഓരോരുത്തര്‍ക്കും അവരവരുടെ ടേസ്റ്റ് അനുസരിച്ച് ആവശ്യമുള്ളവ തെരഞ്ഞെടുക്കാം. മികച്ച വായനാനുഭവം, ഒപ്പം അല്പം ലോകകാര്യവും അറിയാം. പാഴാക്കാന്‍ ഒന്നുമില്ല. സമയം കിട്ടുമ്പോള്‍ സൈറ്റ് സന്ദര്‍ശിക്കുക. അഡ്രസ് ഇതാണ്- www.varthakeralam.കോം
ഇനിയൊരു രഹസ്യം പറയട്ടെ. ഇതിന്‍റെ പിന്നിലെ പട്ടാളം സാക്ഷാല്‍ ബാലചന്ദ്രന്‍ ചീറോത്ത് തന്നെ.

പ്രണാമം... സുധാകര ഗുരോ...

രണ്ടു വയസിലും മൂന്നു വയസിലും പ്രവര്‍ത്തിച്ച അദ്ഭുതങ്ങളാണു ഭാരത നാട്ടിലെങ്ങുമുള്ള ആള്‍ദൈവങ്ങളുടെ അടിത്തറ. ബന്ധുക്കള്‍ പറഞ്ഞുണ്ടാക്കുന്ന കഥകളിലൂടെ കയറിക്കയറി അവര്‍ ദൈവങ്ങളാകുന്നു. പറയാന്‍ ബന്ധുക്കള്‍ തയാറായില്ലെങ്കില്‍ എന്തു ചെയ്യണം?ചോദ്യം നമ്മുടെ മന്ത്രി സുധാകരനോടാകുന്നതാകും കൂടുതല്‍ എളുപ്പം.

കലാകൗമുദി വാരികയില്‍ അദ്ദേഹം അദ്ഭുതപ്രവര്‍ത്തനങ്ങളുടെ പരമ്പരയാണു വെളിപ്പെടുത്തിയിരിക്കുന്നത്‌. സംശയമുള്ളവര്‍ക്കു ബസ്‌ സ്റ്റാന്‍ഡിലോ ബുക്ക്‌ ഷോപ്പിലോ തൂക്കിയിട്ടിരിക്കുന്ന കലാകൗമുദി കള്ളവായന നടത്തിയാല്‍ ഉത്തരം കിട്ടും. മൂന്നര വയസില്‍ രാമായണം വള്ളിപുള്ളി വിടാതെ വായിച്ച ഭക്തശിരോമണിയാണു സുധാകരന്‍. ഞാന്‍ പറയുന്നതല്ല. ബന്ധുക്കളുടെ വാമൊഴിയുമല്ല. സാക്ഷാല്‍ വിപ്ലവ നായകന്‍ സുധാകരന്‍ തന്നെ വെളിപ്പെടുത്തുന്നതാണ്‌. രാമായണത്തിലെ കൂട്ടക്ഷരങ്ങള്‍ വായിക്കാന്‍ മലയാളം മുന്‍ഷിമാര്‍ പോലും വലഞ്ഞിരുന്ന കാലത്ത്‌ മൂന്നര വയസില്‍ സര്‍വ അക്ഷരങ്ങളും സ്വായത്തമാക്കിയ സുധാകരന്‌ മുന്‍ഗാമിയായി ആരെങ്കിലുമുണ്ടോ? വിവേകാനന്ദനു പോലും ഇത്രയേറെ പ്രവര്‍ത്തനക്ഷമമായ തലച്ചോര്‍ ഉണ്ടായിരുന്നോ എന്നു സംശയം.

അവിടംകൊണ്ടു തീരുന്നില്ല. ഒന്നാം തീയതി തോറും നാട്ടിലെ നൂറുകണക്കായ ജനങ്ങള്‍ കണി കാണാന്‍ കാത്തിരുന്നതു സുധാകരനെയാണ്‌. അങ്ങനെ കണ്ടു വന്നവരാണ്‌ പിന്നീടു ശബരിമലയിലും മലയാറ്റൂരും മലഞ്ചെരുവില്‍ അമ്മാ... അയ്യാ... എന്നൊക്കെ വിളിച്ചു കോടികള്‍ സമ്പാദിക്കുന്നത്‌ എന്ന്‌ അസൂയക്കാര്‍ പറഞ്ഞുണ്ടാക്കുന്നതാണ്‌. ശത്രുക്കളും അസൂയക്കാരുമാണല്ലോ എപ്പോഴും സുധാകരന്റെ ഇടത്തും വലത്തും നിന്നു താറടിക്കുന്നത്‌.

പിന്നെപ്പിന്നെ കൊച്ചു സുധാകരന്‍ വളര്‍ന്നു. സാധാരണ കുട്ടികളില്‍ നിന്നെല്ലാം വ്യത്യസ്തനായിരുന്നു അദ്ദേഹത്തിന്റെ രീതികള്‍. മറ്റു കുട്ടികള്‍ തലപ്പന്തു കളിക്കുമ്പോഴും കുട്ടിയും കോലും കളിക്കുമ്പോഴും സുധാകരന്‍ വായനശാലയ്ക്കുള്ളില്‍ അടയിരുന്നു. ആയിരക്കണക്കിനു പുസ്തകങ്ങള്‍ നിറഞ്ഞ വായനശാല. അവിടെയുള്ളതില്‍ ഏറെയും വിദേശ കൃതികളുടെ പരിഭാഷകള്‍.കൊച്ചു സുധാകരന്‍ വായനയുടെ ലോകത്തായിരുന്നു. നിക്കറില്‍ നിന്നു മുണ്ടിലേക്കു കയറ്റംകിട്ടുന്ന പ്രായത്തിനു മുന്നേ അവിടെയുണ്ടായിരുന്ന പുസ്തകങ്ങളത്രയും കാണാപ്പാഠം. പരിഭാഷകള്‍ ഉള്‍പ്പെടെ ആയിരക്കണക്കിനു പുസ്തകങ്ങളിലെ പേജ്‌ നമ്പരും അക്ഷരത്തെറ്റും ഉള്‍പ്പെടെ എല്ലാ കാര്യത്തെക്കുറിച്ചും അറിയാന്‍ പെന്‍ഗ്വിന്‍ ബുക്സ്‌ അടക്കമുള്ളവര്‍ ആശ്രയിച്ചിരുന്നത്‌ ആ കുട്ടിയെയാണെന്ന്‌ ഒരു നാട്ടുകാരന്‍ പറഞ്ഞു. അതു പക്ഷേ വിശ്വസിക്കേണ്ട. അസൂയക്കാരനാണ്‌. അങ്ങനെ രാമായണത്തിലെ കാണ്ഡങ്ങള്‍ എല്ലാം മനപാഠമാക്കി വീടുവീടാന്തരം കണി കാണിച്ചു നടന്ന കുട്ടിക്കാലമുള്ള വേറെ ആരുണ്ട്‌ ഈ ഭൂമി മലയാളത്തില്‍?

ഗുരുവായൂരിലെ ഹരിഗോവിന്ദനെ കണ്ടതു വലിയ തെറ്റായി പറയുന്ന ബി.ജെ.പിക്കാര്‍ക്കോ സുരേന്ദ്രനോ ഇങ്ങനെയൊരു പാരമ്പര്യം അവകാശപ്പെടാനുണ്ടോ? പണ്ട്‌ തന്ത്രിക്കേസുകാലത്ത്‌ സുധാകരനു നല്ല ബുദ്ധിയുണ്ടാകാന്‍ ഹോമം നടത്തിയ നമ്പൂരാര്‍മാരില്‍ ആര്‍ക്കുണ്ട്‌ ഇത്രയേറെ മാഹാത്മ്യം?ഇനിയെങ്കിലും മനസിലാക്കുക. ഹോമങ്ങളും മന്ത്രങ്ങളുമൊന്നും ഏല്‍ക്കാത്ത മഹായോഗിയാണു സാക്ഷാല്‍ സുധാകരയോഗി.കള്ള സ്വാമിമാരെ മനസിലാക്കാന്‍ അദ്ദേഹത്തിനുള്ള കഴിവില്‍ ഇനിയെങ്കിലും ആരും സംശയം പ്രകടിപ്പിക്കാതിരിക്കുക. അതീന്ദ്രിയ ജ്ഞാനം കൂടി വശമുള്ളയാളാണല്ലോ അദ്ദേഹം.

പിന്നെ, സഹോദരന്റെ മരണത്തിനു കാരണക്കാരായ രാഷ്ട്രീയക്കാരില്‍ എന്‍എസ്‌എസിന്റെ വിദ്യാര്‍ഥി വിഭാഗവും ഉണ്ടായിരുന്ന കാര്യം അദ്ദേഹത്തിനു മറക്കാനൊക്കുമോ? അന്നത്തെ വിദ്യാര്‍ഥി നേതാവിനെ സ്വന്തം അനുയായിയാക്കി വാഴുന്ന എന്‍എസ്‌എസ്‌ നേതാക്കളെ ചീത്തവിളിക്കുന്നതിന്റെ പൊരുള്‍ മനസിലായില്ലേ?അന്നത്തെ കേസില്‍ ഉള്‍പ്പെട്ടയാളിന്റെ അച്ഛന്‍ ആര്‍എസ്പിക്കാരനാണ്‌. ദേവസ്വം ബോര്‍ഡ്‌ അംഗത്തിന്റെ നേതാവാണത്രേ അദ്ദേഹം. അപ്പോള്‍പ്പിന്നെ ദേവസ്വം ബോര്‍ഡ്‌ ശരിയാകുമോ?

ദൈവമേ, സര്‍വശക്താ...ആരറിയുന്നു നിന്റെ മനോഗതം.അങ്ങു ചെയ്യുന്ന ഓരോ കാര്യത്തിനും സാധാരണ പാമരന്‌ അപ്രാപ്യമായ പൊരുളുണ്ടല്ലോ.ഇനിയിപ്പോ, കള്ള സന്യാസിമാരുടെ ആശ്രമങ്ങള്‍ മൊത്തം പൊളിച്ചു നീക്കണം. എന്നിട്ടു വേണം ജ്ഞാനിയായ യഥാര്‍ഥ സ്വാമിയുടെ പര്‍ണശാല പണിയാന്‍.
മഹാഗുരോ... അവിടുത്തേക്ക്‌ കോടി പ്രണാമം...
പണ്ട്‌ സുധാകരന്റെ അയല്‍ദേശത്തുണ്ടായിരുന്ന സുധാമണിയാണു പിന്നീട്‌ അമൃതാനന്ദമയിയായി മാറിയതെന്ന്‌ ഓര്‍ക്കുക.

സഖാക്കളെ ഉണരൂ ദൈവ വേലയ്ക്ക് സമയമായി

ആദ്യം നല്ല മനുഷ്യനും പിന്നെ നല്ല കമ്മ്യൂണിസ്റ്റുമാകുക എന്നതായിരുന്നു പഴയ കമ്മ്യൂണിസ്റ്റുകളുടെ ആശയം. അതു പണ്ട്‌. ഒറിജിനല്‍ കമ്മ്യൂണിസ്റ്റാകണമെങ്കില്‍ ആദ്യം നല്ല ഒരു പാസ്റ്റര്‍ ആകുകയാണു വേണ്ടതെന്നാണു പുത്തന്‍ വിപ്ലവത്തിന്റെ ആദ്യപാഠം. ഇതു ഞാന്‍ പറയുന്നതല്ല. കൈരളി പീപ്പിള്‍ എന്ന ജനതയുടെ ആത്മാവിഷ്കാരത്തിന്റെ കടിഞ്ഞൂല്‍ സന്തതി ജനസമക്ഷം വിളിച്ചു പറയുന്നതാണ്‌. കഴിഞ്ഞ ദിവസം കൈരളി പീപ്പിള്‍ ചാനല്‍ കണ്ടപ്പോള്‍ സത്യത്തില്‍ ഒന്നമ്പരന്നു. ചാനല്‍ മാറിപ്പോയോ എന്നായിരുന്നു ആദ്യ ശങ്ക. യോഹന്നാന്റെ പവര്‍ വിഷനോ കത്തോലിക്കരുടെ മതേതര ചാനലായ ശാലോമോ കൈപ്പിഴ പറ്റി കടന്നു കൂടിയതാകാമെന്നു കരുതി സൂക്ഷിച്ചു നോക്കി. ഇല്ല. തെറ്റിയിട്ടില്ല. പീപ്പിള്‍ തന്നെ. ഒരു പാസ്റ്റര്‍ നിന്നു യേശു വിളിക്കുന്നു യേശു വിളിക്കുന്നു എന്ന്‌ ചങ്കു പൊട്ടി വിളിക്കുന്നു. അവസാനം പതിവു പാസ്റ്റര്‍ ശൈലിയില്‍ ഇങ്ങനെയും പറഞ്ഞു,....ഇന്നു നീ ദൈവത്തോടു കൂടിയായിരിക്കുന്നു. ഇതു കാണുന്ന എല്ലാവരും കര്‍ത്താവിന്റെ കൂടെയെത്തിയിരിക്കുന്നു. ഏകരക്ഷകനായ യേശു ഇതാ നിന്റെ സകല രോഗ ദുരിതങ്ങളും ഈ നിമിഷത്തില്‍ ശമിപ്പിക്കുന്നു. നമുക്കു പ്രാര്‍ഥിക്കാം.... പിന്നെ അതിശക്തമായ കൊട്ടിപ്പാടി സേവയും.ഇടതു പക്ഷ പുരോഗമന പ്രത്യയശാസ്ത്രത്തിന്റെ വക്താക്കളുടെ ചാനലില്‍ പെന്തക്കോസ്തു സുവിശേഷമോ എന്നോര്‍ത്തിരുന്നപ്പോള്‍ അന്തവും കുന്തവും ഇല്ലാത്ത നിലയിലായിപ്പോയി. അത്യാവശ്യം ആഗോളീകരണത്തിന്റെയും കമ്പോളവത്കരണത്തിന്റെയും സിംബലുകളായ മെട്രോ ഭാഷയും ഫാഷന്‍ ഷോയും ചുള്ളന്‍മാര്‍ക്കു പെണ്‍പിള്ളേരെ ഓസില്‍ ട്യൂണ്‍ ചെയ്യാനുള്ള അവസരവും നേരത്തേ ഒരുക്കിയതു ചാനല്‍ ബിസിനസില്‍ കാശുണ്ടാക്കാനുള്ള അടവുനയം മാത്രമാണെന്ന ഉറച്ച വിശ്വാസത്തിലായിരുന്ന ഞാന്‍ പക്ഷേ, സുവിശേഷം കണ്ടപ്പോള്‍ ആകെ തകര്‍ന്നു.ഇതിന്റെ പൊരുളെന്ത്‌ എന്ന്‌ ഏറെ ചിന്തിച്ചു. ചിന്ത ഏറെ കാടുകയറിയെങ്കിലും എത്തും പിടിയും കിട്ടിയില്ല.അങ്ങനെ ചിന്തയില്‍ പടര്‍ന്ന കാട്ടിലെ പടര്‍പ്പുകളില്‍ കുടുങ്ങി ഇരിക്കുമ്പോഴാണു പഴയൊരു സഖാവ്‌ ദര്‍ശനത്തിനെത്തിയത്‌. വിവരം അറിഞ്ഞ സഖാവ്‌ വെറുതേ പൊട്ടിച്ചിരിച്ചു. കാശുള്ളവന്‍ ചിരിക്കുമ്പോള്‍ അര്‍ഥമറിയാതെ കൂടെ ചിരിക്കുന്ന എര്‍ത്തിന്റെ ഭാവത്തോടെ ഞാനും. ചിരി അടങ്ങിയെന്നു തോന്നിയപ്പോള്‍ ചോദിച്ചു.സഖാവെന്തിനാ ചിരിച്ചത്‌യതാനെന്തിനാടോ പൊട്ടാ കൂടെച്ചിരിച്ചത്‌യ-മറുചോദ്യം.കഥയറിയാതെ ആട്ടം കാണലാണല്ലോ പതിവെന്ന ന്യായം സഖാവ്‌ അംഗീകരിച്ചു. പിന്നെ എന്റെ ധര്‍മസങ്കടത്തിനു നിവൃത്തിയുണ്ടാക്കി.താന്‍ ഏതു ലോകത്താടോ ജീവിക്കുന്നത്‌? കുറേ ദിവസമായി നമ്മുടെ ഡിവൈഎഫ്‌ഐ സഖാക്കള്‍ സ്വാമിവേട്ട നടത്തുകയല്ലേ. ഒന്നു രണ്ടു ലോക്കല്‍ നേതാക്കള്‍ ഇതിനിടെ ചില ന്യൂനപക്ഷ മതേതര കച്ചവടക്കാരെക്കുറിച്ചു ചിലതെല്ലാം പരോക്ഷമായി പറഞ്ഞത്‌ അറിഞ്ഞിരിക്കാനിടയില്ല. പക്ഷേ പാര്‍ട്ടി അറിഞ്ഞതിന്റെ തെളിവല്ലേ ഇത്‌. പാസ്റ്റര്‍മാര്‍ നമ്മുടെ ആളുകളാണെന്ന്‌ ഡിഫിക്കാരെ അറിയിക്കാന്‍ ഇനി വേറെ സര്‍ക്കുലര്‍ ഇറക്കേണ്ട കാര്യമുണ്ടോ? പാര്‍ട്ടി ചാനലില്‍ യേശുവിന്റെ സുവിശേഷം വിളമ്പുക എന്നാല്‍ പാര്‍ട്ടിയുടെ പെട്ടി വലുതാക്കുക എന്നാണല്ലോ അര്‍ഥം. ചുരുക്കിപ്പറഞ്ഞാല്‍, പാസ്റ്റര്‍മാരെ തൊട്ടാല്‍ ഡിഫി മക്കളേ നിങ്ങള്‍ അധികകാലം മുന്നോട്ടു പോവില്ല എന്ന ശക്തമായ മുന്നറിയിപ്പു തന്നെ. എല്ലായ്പ്പോഴും പാര്‍ട്ടി സെക്രട്ടറിക്കു നേരിട്ടെത്തി കോട്ടയം സമ്മേളനത്തിലേതു പോലെ കൈകാര്യം ചെയ്യാനാവില്ലല്ലോ. ഇപ്പോ മനസിലായോ പഴയ സഖാവേ? ഉത്തരം കേട്ടിരുന്നപ്പോള്‍ സ്വയം പുച്ഛിക്കുകയായിരുന്നു. സ്വന്തം ബുദ്ധിശൂന്യതയോര്‍ത്ത്‌. വൈകിയില്ല, പീപ്പിളിനയയ്ക്കാനുള്ള കത്തിന്റെ ഏകദേശരൂപം തയാറാക്കി. അടുത്തയാഴ്ച തങ്കു പാസ്റ്ററുടെ പ്രസംഗം പീപ്പിളില്‍ പ്രതീക്ഷിക്കുന്നു. തുടര്‍ന്ന്‌, സാം കുഴിക്കാല, യോഹന്നാന്‍ ബിഷപ്പ്‌, ആടു തോമ തുടങ്ങി മതേതരന്മാരും പാവം കോടീശ്വരന്‍മാരുമായ സുവിശേഷ സഖാക്കളേയും പീപ്പിളില്‍ക്കൂടി കേട്ടു മാനസാന്തരപ്പെട്ട്‌ അനുഭവസാക്ഷ്യം പറയാന്‍ അവസരമുണ്ടാക്കുമല്ലോ. സാധിക്കുമെങ്കില്‍ അടുത്ത ഘട്ടമായി തങ്ങള്‍മാരുടെ ചരടുജപിക്കലും ഓതിക്കൊടുക്കലും വെള്ളം ജപിച്ചു തളിക്കലും പരിപാടിയില്‍ ഉള്‍പ്പെടുത്തണം. അതിനു മുമ്പ്‌ ശബരിമലയിലെ മകരവിളക്കിനെക്കുറിച്ചു പത്തു തെറി ചേര്‍ക്കുന്നതും നന്നായിരിക്കും.

ഇനിയും കുറച്ച് അപ്രിയം

അപ്രിയ സത്യങ്ങള്‍ മൂടി വയ്ക്കപ്പെടേണ്ടതു തന്നെ. എങ്കിലും അതെല്ലാം വിളിച്ചു കൂവാന്‍ ആരെങ്കിലും വേണ്ടേ?ഞാന്‍ ഒരു സാഹിത്യകാരനോ അല്ലെങ്കില്‍ അങ്ങനെ ഭാവിക്കുന്നവനോ ബുദ്ധിജീവിയോ അല്ല.സാധാരണക്കാരനായ ഒരാള്‍ മാത്രം. പക്ഷേ, ഒരുപാട്ബുദ്ധിജീവി ജാഡകളെ കണ്ടിട്ടുണ്ട്‌. പത്രപ്രവര്‍ത്തനം തുടങ്ങിയിട്ടു പതിനഞ്ച് വര്‍ഷമേ ആയിട്ടുള്ളൂ. അവാര്‍ഡു വാങ്ങിയിട്ടില്ല. അതിനു തക്കവണ്ണം കയ്യില്‍ തുട്ടും ഇല്ല. നക്കാപ്പിച്ച ശമ്പളം ആണല്ലോ ഏറെക്കാലവും കിട്ടിയിട്ടുള്ളത്‌. അടുത്തിടെയായി താരതമ്യേന വലിയ കുഴപ്പം ഇല്ല.പറഞ്ഞു വരുന്നതു മറ്റൊന്നാണു. അടുത്തിടെയായി പത്രപ്രവര്‍ത്തനം ഹരമാക്കി ഇറങ്ങുന്ന പുത്തന്‍ തലമുറക്കാരുടെ എണ്ണം കൂടിയിട്ടില്ലേ എന്നൊരു തോന്നല്‍. അത്‌ വെറും തോന്നല്‍ അല്ലതാനും. വന്‍ തുക മുടക്കി ഈ കുന്തം സ്വായത്തം ആക്കാന്‍ എന്താണു പ്രേരകം എന്നു നിരീക്ഷിക്കുമ്പോഴാണു ചില അപ്രിയ സത്യങ്ങള്‍ പുറതു ചാടുന്നത്‌.സിനിമയിലെ പത്ര പ്രവര്‍ത്തകന്‍ അല്ലെങ്കില്‍ പത്ര പ്രവര്‍ത്തക, മുഖ്യമന്ത്രിയുടെ വരെ കുത്തിനു പിടിക്കുന്ന കാഴ്ചകള്‍. പിന്നെ ലാപ്റ്റോപ്പും തൂക്കി എസി മുറിയിലേക്ക്‌. പഞ്ച്‌ നക്ഷത്ര സൗകര്യങ്ങള്‍. മദിപ്പിക്കുന്ന രംഗങ്ങള്‍.ഇതൊക്കെ കണ്ട്‌ പത്രപ്രവര്‍ത്തന ക്ലാസ്സ്‌ നടത്തിപ്പുകാര്‍ക്കു വന്‍ തുക നല്‍കി വാങ്ങുന്ന സര്‍ട്ടിഫിക്കറ്റുമായി ജോലി തേടി ഇറങ്ങുമ്പോഴല്ലേ പൊള്ളത്തരം പിടി കിട്ടുക.എന്താണു പത്രം ഓഫീസില്‍ അവര്‍ക്കു കിട്ടുന്ന പണി എന്നറിയമോ? ചരമ കോളം തിരുത്തി എഴുതുക, ഇന്നത്തെ പരിപാടി സ്റ്റൈല്‍ അനുസരിച്ചു തയ്യാറാക്കുക... ഗംഭീര ലേഖനങ്ങളിലൂടെ സമൂഹ മനസാക്ഷി തൊട്ടുണര്‍ത്താന്‍ ഇറങ്ങിപ്പുറപ്പെട്ടവര്‍. എതിയതോ?കുറെയേറെ ഈഗോയും അതിലേറെ ജാഡകളും കൈമുതലാക്കി അടയിരിക്കുന്ന ഞാന്‍ അടക്കമുള്ള വിവര ദോഷികളുടെ ഗീര്‍വാണം കേള്‍ക്കണം. പിന്നെ, ആവശ്യത്തില്‍ ഏറെ ടെന്‍ഷനും.ശമ്പളത്തെക്കുറിച്ചു കൂടുതല്‍ പറയാനില്ല. നക്കാപ്പിച്ച ശമ്പളം ആണു മലയാള പത്രങ്ങള്‍ കൊടുക്കുന്നതെന്നതു രഹസ്യം അല്ല. 10000 രൂപയ്ക്കു മേല്‍ മാസപ്പടി വാങ്ങുന്ന എത്ര പത്രക്കാരുണ്ടു കേരളത്തില്‍? തുടക്ക ശമ്പളം 2000 മുതല്‍ ആണെന്ന കാര്യം രഹസ്യം ആക്കി വച്ചിട്ടു കാര്യം വല്ലതും ഉണ്ടോ?ഏതായാലും ഇറങ്ങിപ്പുറപ്പെട്ടു. വീട്ടുകാരും നാട്ടുകാരും അണിയറ കാണുന്നില്ലല്ലോ. പിന്നെ, ചെയ്യാവുന്നതു പുറം പൂച്ചു കാണിക്കുക മാത്രം. അതിനു ചില്ലറ സാഹിത്യകാരന്മാരുടെ കുറിപ്പുകളില്‍ നിന്നും വിദേശ എഴുത്തുകാരുടെ അറിയപ്പെടുന്ന വരികളില്‍ നിന്നും കടമെടുത്തു സ്വന്തം പേനയിലൂടെ എഴുതാം.അങ്ങനെ ചെയ്യുന്ന ചിലര്‍ ചില ഗള്‍ഫ്‌ രാജ്യങ്ങളിലും ചേക്കേറിയിട്ടുണ്ട്‌. അവിടെ മറ്റ്‌ ജോലി ചെയ്യുന്നതിനിടെ അല്ലറ ചില്ലറ പത്രപ്രവര്‍ത്തനം. അവിടെ റിപ്പോര്‍ട്ടെര്‍മാര്‍ ഇല്ലാത്ത പത്രങ്ങള്‍ക്കും ചാനലുകള്‍ക്കും ദിവസക്കൂലിക്കു വാര്‍ത്ത എത്തിക്കും. പറഞ്ഞു നടക്കുന്നതോ, പത്രപ്രവര്‍ത്തകന്‍.ഇപ്പോള്‍ ഞാന്‍ പറഞ്ഞത്‌ അത്രയും അപ്രിയ സത്യങ്ങള്‍ ആണെന്നറിയാം. ഇതിന്റെ പേരില്‍ എന്നെ ക്രൂശിക്കാന്‍ ഇറങ്ങുന്നവര്‍ക്കു സ്വാഗതം. ഭാഷയെക്കുറിച്ചും ശൈലിയെക്കുറിച്ചും അവര്‍ക്കുള്ളത്ര ജ്ഞാനം എനിക്കുണ്ടാവാന്‍ തരമില്ല. ക്ഷമിക്കുക.

മഴക്കഥ എഴുതിയതിനു മാപ്പ്

തെറ്റ്‌ പറ്റിയാല്‍ തിരുത്താം. കമ്മ്യൂണിസ്റ്റ്‌ ആയാലും കത്തോലിക്കാ സഭ ആയാലും തെറ്റു തിരുത്തുന്നതില്‍ ആരും കുറ്റം കാണില്ല.മഴ പെയ്തപ്പോള്‍ തോന്നിയ ചില ഭ്രാന്തന്‍ ചിന്തകള്‍ ബ്ലോഗില്‍ കുറിച്ചിട്ട തെറ്റിനു മാപ്പു ചോദിക്കട്ടെ.ഒരു മഴ പെയ്തതേയുള്ളു. പത്രങ്ങളായ പത്രങ്ങളില്‍ പേനയുന്തുന്ന സകല പയ്യന്മാരും പയ്യത്തികളും മഴയുടെ പിന്നാലെയായി. പണ്ടു വാഴയിലയും ചേമ്പിലയും തലയില്‍ ചൂടി സ്കൂളില്‍ പോയത്രേ. അനുസാരിയായി ചില സഹിത്യ ശകലങ്ങളും. പഴയ ഒരു സിനിമയിലെ ഡയലോഗു കടം എടുക്കട്ടെ."അല്ല, ഞാന്‍ അറിയാഞ്ഞിട്ടു ചോദിക്കുകയാ."വാഴയിലയും ചേമ്പിലയും കുടയാക്കി സ്കൂളില്‍ പോയ ചരിത്രം പറയാന്‍ ഇവരാരാ? ഈ എഴുതിക്കൂട്ടുന്ന പിള്ളേരുടെ ചെറുപ്പ കാലത്തു നല്ല ശീലക്കുട ആവശ്യത്തിനു കിട്ടുമായിരുന്നല്ലോ. ഏതെങ്കിലും കാര്‍ന്നോന്മാര്‍ ആയിരുന്നു എഴുതിയതെങ്കില്‍ പോട്ടെ. ഇതിപ്പൊ, 25 വയസു തികയാത്ത കിടാങ്ങള്‍ ഇങ്ങനെ ഒക്കെ എഴുതുന്നതു കാണുമ്പോള്‍ ഈ പണി നിര്‍ത്തിയാലോ എന്നാണു ചിന്ത.പക്ഷേ, ജീവിക്കാന്‍ പത്രപ്രവര്‍ത്തനം അല്ലാതെ വേറേ വിദ്യകള്‍ വശമില്ലാത്തതിനാല്‍ അതു നിര്‍ത്താനും പറ്റില്ല.കേട്ടു പഴകിയ ചില പ്രയോഗങ്ങള്‍ മനസില്‍ നിന്നു കളഞ്ഞിട്ടു സ്വന്തം നിലയ്ക്കു തലച്ചോറു പ്രവര്‍ത്തിപ്പിക്കാന്‍ പ്രിയ അനിയന്മാരേ അനിയത്തിമാരേ നിങ്ങള്‍ ശ്രമിക്കുക. അല്ലാതെ എണ്‍പതുകളില്‍ അന്നത്തെ മിടുക്കന്മാര്‍ എഴുതിയുണ്ടാക്കിയ ശൈലി സ്വന്തം പേനയിലൂടെ പുറത്തെടുക്കരുത്‌. നിങ്ങള്‍ക്കും ഗുണമില്ല, പത്രത്തിനും ഗുണമില്ല. ന്യൂസ്‌ പ്രിന്റിനും മഷിക്കും അന്തംവിട്ട വിലയല്ലേ കുഞ്ഞുങ്ങളേ. ചുവരുണ്ടെങ്കിലേ ച്ത്രം എഴുതാനൊക്കൂ. മുതലാളി കുത്തുപാളയടുത്താല്‍ എല്ലാവനും തെണ്ടും. അതു മറക്കാതിരിക്കുക.സര്‍വം അറിയുന്ന പ്രപഞ്ച സത്യമേ... ബ്ലോഗില്‍ ഭ്രാന്തന്‍ ചിന്തകള്‍ കോറിയിട്ടതിനു മാപ്പ്‌.